[:tj]6 июли соли равон дар шаҳри Хоруғ раҳпаймоии оммавии сокинони шаҳр ва кормандони идораю муассисаҳои давлатию ғайридавлатӣ таҳти шиори «Бадахшон зидди маводи мухаддир» баргузор гардид.
Ташкилкунандаи ин чорабинӣ мақомоти иҷроияи ҳокимияти давлатии вилоят буда, дар он худихтиёрӣ шахсони аз сини томактабӣ то пиронсолони нафақахур иштирок намуданд. Дар рахпаймоӣ Раиси ВМКБ Ёдгор Файзов иштирок намуда, оиди зарари вабои аср ба саломатӣ, сатҳи зиндагии аҳолӣ, ояндаи миллати тоҷик, обрӯю нуфузи Тоҷикистон чун давлати мустақил дар арсаи байналхалқӣ суханронӣ намуд. Раиси вилоят қайд кард, ки баъди пошхурдани собиқ Иттиҳоди Шӯравӣ ин вабои аср ба миллати тоҷик, ба хусус сокинони ВМКБ бадбахтиҳои зиёдеро овард, ки дар натиҷаи истеъмоли он садҳо ҷавонон дар айни камолоти зиндагӣ ҷони худро аз даст доданд, садҳо нафар ҷиҳати қочоқу фуруши он дар маҳбасхонаҳо умр ба сар бурда истодаанд, падару модарон, фарзандони фавтидагону маҳбасшудагон дар фироқи фарзандону падарони худ дар гиряю нолонанд.
Сардори Агентии мубориза бар зидди маводи мухаддири назди Президенти ҶТ дар ВМКБ дар баромадаш қайд намуд, ки дар қаламрави вилоят чандин килограмм маводи мухадири навҳои гуногун аз тарафи мақомоти қудратии вилоят ва агентӣ нест карда шуд ва тамоми сохторҳои давлатӣ ба муқобили он муборизаи ҳаррӯза бурда истодаанд.
Дар ин аксия инчунин байни хонандагони муассисаҳои таҳсилоти умумӣ озмуни расмкашӣ дар мавзӯи «Оқибатҳои маводи мухаддир» баргузор гардид ва ғолибони он сазовори мукофотҳо гардиданд.
Бояд қайд намуд, ки кормандони шуъбаи Хадамоти муҳоҷирати вилоят, шаҳру ноҳияҳо низ мунтазам дар мубориза зиди қочоқи маводи мухаддир фаъолона иштирок намуда, бо муҳоҷирони меҳнатӣ оиди зарари он барои ҳаёти инсон, хатари қочоқи он барои сафари сокинони вилоят ба мамлакатҳои хориҷӣ корҳои фаҳмондадиҳӣ бурда истодаанд. Ба шарофати ин кори ҳаррӯзаи онҳо дар солҳои охир шумораи муҳоҷироне, ки ба қочоқи маводи мухаддир ҳангоми муҳоҷират даст мезананд, қариб ба назар намерасад.
Шуъбаи Хадамоти муҳоҷират
дар ВМКБ
[:]
