Вақте ба фарҳанг ва тамаддуни ҷаҳонӣ менигарем, некӣ ва накӯкорӣ, ахлоқи шоиста доштан ҳамчун омилҳои расидан ба мақсадҳои олӣ тараннум гардидаанд. Некӣ ва накӯкорӣ, инсонгароӣ ва инсонпарастӣ аст, ки ҷаҳони имрӯза пойбарҷост.

Имрӯз ҷомеаи моро бе ҳастии фарҳангу тамаддун ва маорифу илми пешрафта тасаввур намудан ғайриимкон аст. Маҳз, ахлоқу одоби шоиста, рафтору кирдори нек, ваҳдату ягонагӣ аст, ки ҷомеа рушду такомул меёбад ва барои насли ояндасози миллат фарҳанги шоистаро ба мерос мегузорад. Мутаассифона, имрӯзҳо на танҳо дар ҷомеаи мо, балки дар ҷомеаи ҷаҳонӣ бархе афрод ҳастанд, ки бо хулқу атвори ношоистаи хеш амнияти мардум, зиндагии осоиштаро ноором кардан мехоҳанд.

Дар тамаддуни инсонӣ аз ибтидо инсони хайрхоҳ будан, ба ҳамдигар кӯмаку дасти ёрӣ дароз кардан, якдигарро эҳтиром намудан, ба олам ба назари нек нигаристан, ятимонро парастидан, калонсолонро эҳтиром намудан, ҳаққи ҳамсоягиро ба ҷой овардан, бо якдигар додугирифт кардан ва монанди ин атвори нек талқин шудааст. Ҳамаи инро дониста, ифротгароён боз ҳам ба ноором кардани сулҳу суботи ҷомеаи имрӯзаи мо даст мезананд. Онҳо дарк намекунанд, ки амалҳои ношоистаашон барои авлоду аҷдодашон ба таври абадӣ, ҳамчун доғ боқӣ мемонад.

Воқеан, ҳар инсон бояд барои ваҳдат, иттиҳоду муттаҳидӣ кӯшиш намояд. Ваҳдат ҷомеаро ба мақсадҳои олӣ мерасонад. Тавассути ваҳдат халқияту миллатҳо аз фарҳанги якдигар бохабар мегарданд, Ваҳдат одамонро сарҷамъ мекунад, арҷ гузоштан ба арзишҳои олии миллиро дар ниҳоди онҳо ташаккул медиҳад.

Шукри Истиқлолияти ватанамон аст, ки он аз ваҳдат сарчашма мегирад. Имрӯз ба шарофати ваҳдату ҳамгироӣ мардуми кишвари азизу биҳиштосои мо меҳнати суботкоронаву бунёдкоронаро ривоҷу равнақ бахшида, рӯз ба рӯз сарзаминамонро боз ҳам ободу шукуфонтар мегардонанд. Имрӯз мо, сокинони кишвар бояд Истиқлолияти давлатӣ, Ваҳдати миллиро чун гавҳараки чашм ҳифз намоем ва дар зери Парчами Ҷумҳурии Тоҷикистон сарҷамъ шавем.

Мо, насли ҷавони кишвар имрӯз, ки тамоми шароитҳо барои таҳсилу илмомӯзии мо фароҳам оварда шудааст, бар он кӯшиш менамоем, ки бо илму дониши муосир мусаллаҳ бошем ва соҳиби маълумоти олӣ гашта, баҳри рушду такомули мамлакати худ саҳмгузор гардем.

Шерова Шаҳодат,
Мутахассиси Раёсати ҳуқуқ,
кадр ва корҳои махсуси Хадамоти муҳоҷират