18–уми октябри соли 2023 дар маҷлисгоҳи мақомоти иҷроияи ҳокимияти давлатии вилоят таҳти роҳбарии муовини Раиси вилоят, Раиси Комиссия ва сарпарасти соҳа Анвар Яъқубӣ бо иштироки аъзоёни Комиссия – роҳбарони сохторҳои мақомоти иҷроияи ҳокимияти вилоят, муовинони раисони шаҳру ноҳияҳо, мудирони бахш ва сардорони шуъбаҳои Хадамоти муҳоҷират дар шаҳру ноҳияҳои интиқолдиҳандаи муҳоҷирони дохилӣ ва экологӣ – Хуҷанд, Панҷакент, Исфара, Деваштич, Айнӣ, Ашт ва Кӯҳистони Мастчоҳ ҷаласаи навбатии Комиссияи байниидоравии равандҳои муҳоҷирати дохилӣ ва экологӣ дар вилояти Суғд баргузор гардид.
Дар рафти ҷаласа асосан масъалаи кӯчонидани муҳоҷирони экологӣ ба мавзеъҳои бехавф, ташкили инфрасохтор, тақсимоти қитъаи замини наздиҳавлигӣ ва ҳуҷҷатгузории он, дастрас намудани қарзи имтиёзнок ва кӯмакпулии яквақтаина, ҳамчунин сафарбар намудани муҳоҷирони дохилӣ мавриди баррасӣ қарор гирифт.
Зимни сухани ифтитоҳии худ Раиси комиссияи вилоятӣ – муовини Раиси вилоят Анвар Яъқубӣ иштирокчиёнро бо мақсад ва рӯзномаи машварат шинос намуд.
Баъдан ахбороти Зоидов Ҳусейнҷон, мудири бахши муҳоҷирати дохилӣ ва экологии Раёсати Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон дар вилояти Суғд оид ба рафти иҷрои қарорҳои Ҳукумати Ҷумҳурии Тоҷикистон аз 3 декабри соли 2021, таҳти №518 «Дар бораи тартиби амалӣ намудани муҳоҷирати дохилии аҳолӣ аз ноҳияҳои камзамин ва сераҳолии кӯҳистон ба водиҳои дорои заминҳои бекорхобидаи ҷумҳурӣ барои солҳои 2022 – 2024» ва аз 28 ноябри соли 2020, №648 «Дар бораи Нақшаи миёнамӯҳлати муташакилона кӯчонидани муҳоҷирони экологӣ барои солҳои 2021 – 2023» шунида шуд.
Қайд гардид, ки дар шаҳру ноҳияҳои вилоят бобати иҷрои қарори мазкур корҳои муайян ба анҷом расида бошад ҳам, дар шаҳру ноҳияҳои Панҷакент, Исфара, Айнӣ, Деваштич ва Кӯҳистони Мастчоҳ норасоиву камбудиҳо низ ба чашм мерасад.
Муовини Раиси вилоят Анвар Яъқубӣ аз намояндагони ин шаҳру ноҳияҳо пурсиш ба амал оварда, барои бартараф намудани камбудиҳои мавҷуда дар назди раисони комиссияи шаҳру ноҳияҳои дахлдор вазифаҳои мушаххас гузошт.
Ҳамчунин оид ба ташкили инфрасохтори зарурӣ аз ҷониби Раиси Комиссияи вилоятӣ роҳбарони сохторҳои дахлдори вилоят пурсиш карда шуда, ба онҳо бобати ҳарчӣ зудтар ташкил намудани инфрасохтор дар мавзеъҳои муҳоҷирнишин ва ба нақшаи буҷети соли 2024–и худ ворид намудани банди алоҳида бобати иҷрои қарорҳои болозикр вазифадор гардиданд. Барои иҷрои ҳамаи супоришу вазифагузориҳо то ҷаласаи минбаъда мӯҳлат муқарар карда шуд.
Ҷаласаи Комиссияи байниидоравии танзими равандҳои муҳоҷирати дохилӣ ва экологии назди мақомоти иҷроияи ҳокимияти давлатии вилоят бо қабули қарори дахлдор ба анҷом расид.
Раёсати Хадамоти муҳоҷират дар вилояти Суғд
