3 майи соли равон дар МД «Марказҳои машваратӣ ва омодагии пеш аз сафари муҳоҷирони меҳнатӣ» – и Хадамоти муҳоҷират аввалин маротиба барои шаҳрвандони Тоҷикистон, ки бо мақсади муҳоҷирати корӣ ба Россия сафар мекунанд, имтиҳон аз забони русӣ, таърих ва асосҳои қонунгузории ФР қабул карда шуд.

Тавре аз Муассисаи давлатии «Марказҳои машваратӣ ва омодагии пеш аз сафари муҳоҷирони меҳнатӣ» дар шаҳри Душанбе хабар доданд, имтиҳон дар чаҳорчӯби қарордоде, ки моҳи декабри соли 2022 бо Маркази санҷиши забонҳои Донишгоҳи давлатии Санкт-Петербург ба имзо расида буд, ба нақша гирифта шудааст.

Гурӯҳи аввали шаҳрвандони ҷумҳурӣ ба таври ройгон имтиҳон супорида, соҳиби шаҳодатномаи дахлдор, ба муҳлати панҷ сол соҳиб гардиданд.

Зимнан зикр гардид, ки агар ин тартиб тибқи тамоми меъёрҳои зарурӣ сурат гирад, дар оянда ба таври доимӣ санҷиши дониши забони русӣ байни муҳоҷирони тоҷик дар қаламрави Ҷумҳурии Тоҷикистон ҷорӣ карда мешавад.

Арзиши чунин имтиҳонҳо тақрибан ба 200 сомонӣ баробар мегардад.

Дар суҳбат, муовини директори Маркази санҷиши забонҳои Донишгоҳи давлатии Санкт-Петербург Александр Дроздов иброз намуд, – “Мо аввалин имтиҳони тестиро аз забони хориҷии русӣ, аз таърихи Россия ва асосҳои қонунгузории Федератсияи Россия гузаронидем.

Пас аз бомуваффақият супоридани имтиҳонот ба иштирокчиён Шаҳодатномаи давлатӣ барои гирифтани иҷозатномаи корӣ (патент) дар ҳудуди ФР дода мешавад. Дар оянда имтиҳонҳо ҳангоми омода намудани гурӯҳ мунтазам гузаронида мешавад”.

Инчунин ӯ қайд кард, ки супоридани имтиҳон имконият медиҳад ба шаҳрвандони Тоҷикистон барои гирифтани иҷозатномаи иқомат (ВНЖ) ва шаҳрвандии Федератсияи Россия.

Хоҳишмандон метавонанд дар Муассисаи давлатии “Марказҳои машваратӣ ва омодагии пеш аз сафари муҳоҷирони меҳнатӣ” дар шаҳри Душанбе,

Хадамоти муҳоҷират номнавис шаванд. Телефонҳо барои тамос: 225-05-75,225-02-21.

Маркази матбуоти Хадамоти муҳоҷират