Дар доираи татбиқи ташаббусҳои Ҳукумати Ҷумҳурии Тоҷикистон ҷиҳати тақвияти робита бо аҳолии маҳал ва баланд бардоштани сатҳи огоҳии шаҳрвандон аз масъалаҳои муҳими иҷтимоӣ ва ҳуқуқӣ, дар ҷамоати деҳоти Танобчӣ деҳаи Танобчии поёни ноҳияи Темурмалик вохӯрии навбатӣ бо сокинон доир гардид.
Дар вохӯрӣ муовинони Раиси ноҳия Аслиддин Айниддин, Раиси Кумитаи иҷроияи Ҳизби Халқии Демократии Тоҷикистон дар ноҳия Маҳмадсаид Р., мудирони бахши дин, танзими ҷашну маросим Худойназаров М., бахши Хадамоти муҳоҷират Сафарзода Б., ва раиси ҷамоати деҳоти Танобчӣ Талбаков Д., иштирок ва суханронӣ намуданд.
Зимни баромад масъулин оид ба нуктаҳои Паёми Президенти кишвар, Пешвои муаззами миллат муҳтарам Эмомалӣ Раҳмон ба Маҷлиси Олии Ҷумҳурии Тоҷикистон, иҷрои қонунҳои Ҷумҳурии Тоҷикистон, тарбияи дурусти насли наврас ва ҷавонон, ҳидоят намудани онҳо ба роҳи созандагӣ ва ватандӯстӣ, донишомӯзӣ, аз худ кардани касбу ҳунар, ҷалби ҷавонон ба сафи Қувваҳои мусаллаҳи Ҷумҳурии Тоҷикистон, иштироки фаъолона дар озмунҳои ҷумҳуриявӣ, пешгирии шомилшавии ҷавонон аз гурӯҳҳои террористӣ ва экстремистӣ, муҳоҷирати бехатар, қонунҳои нави кишвари Россия дар самти муҳоҷират, ифтихор аз ватандорӣ, арзишҳои миллӣ, баланд бардоштани маърифати ҳуқуқии сокинон, ҳаққи пардохти хизматрасонии қувваи барқ баромад намуданд.
Дар рафти вохӯрӣ мудири бахши Хадамоти муҳоҷират дар ноҳияи Темурмалик Сафарзода Баҳодур, ба самъи сокинон расонид, ки аз 1 сентябри соли 2025 дар шаҳри Москва ва вилояти Москва тартиби нави бақайдгирии шаҳрвандони хориҷие, ки бо мақсади фаъолияти меҳнатӣ бе раводид ба Федератсияи Россия ворид мешаванд, ҷорӣ карда мешавад.
Шаҳрандони Ҷумҳурии Тоҷикистон, ки бо мақсади кор ба кишвари Россия меоянд, инчунин аъзои оилаҳои онҳо, вазифадоранд ба қайд гирифта шаванд. Барои ин зарур аст ба Маркази бисёрфунксионалии муҳоҷират дар Сахарово ё ба шуъбаҳои ҳудудии Раёсати корҳои дохилии Россия оид ба масъалаҳои муҳоҷират муроҷиат намоянд.
Дар рафти бақайдгирӣ гирифтани изи ангуштон (дактилоскопия) ва аксбардорӣ гузаронида мешавад. Ҳамчунин, аз 1 сентябри соли 2025 насби барномаи мобилии “Амина” ҳатмӣ мегардад. Ин барнома ҷойгиршавии муҳоҷирро сабт намуда, маълумотро дар бораи мақоми ҳуқуқии ӯ намоиш медиҳад.
Набудани қайдгирӣ дар ҷои иқомат, инчунин рад кардани истифодаи барномаи мобилӣ ҳамчун вайронкунии қоидаҳои муҳоҷират ҳисобида шуда, метавонад боиси ҷавобгарии маъмурӣ, то ихроҷ аз ҳудуди Федератсияи Россия ва манъи воридшавии такрорӣ гардад.
Ба шаҳрвандони Ҷумҳурии Тоҷикистон ва аъзои оилаҳои онҳо тавсия дода мешавад, ки пешакӣ шароити иқоматро муайян намуда, тамоми ҳуҷҷатҳои заруриро бо худ дошта бошанд ва дар ҳолати пайдо шудани саволҳо барои тавзеҳот ба Намояндагии Вазорати меҳнат, муҳоҷират ва шуғли аҳолии Ҷумҳурии Тоҷикистон дар Федератсияи Россия ё ба шуъбаҳои ҳудудии мақомоти муҳоҷиратии Россия муроҷиат намоянд.
Дар охир қайд гардид, ки ҳар як сокинони кишвар баҳри ободиву созандагӣ ва пешрафту шукуфоии Ватани хеш худро масъул шуморида, дар чорабиниҳои сиёсиву ҷамъиятӣ бояд фаъол бошанд.
Раёсати Хадамоти муҳоҷират дар вилояти Хатлон
