Имрўзҳо кормандони шуъбаи Хадамоти муҳоҷират дар шаҳри Кӯлоб дар фурудгоҳи байналмилалӣ оид ба татбиқи дастуру супоришҳои роҳбарияти Вазорати меҳнат, муҳоҷират ва шуғли аҳолии Ҷумҳурии Тоҷикистон бурдани корҳои фаҳмондадиҳиро дар байни муҳоҷирони меҳнатӣ, ки азми сафари кишвари Федератсияи Россия ва дигар давлатҳои хориҷа доранд, пурзўр намуда истодаанд.

Дар рафти гузаронидани корҳои фаҳмондадиҳӣ ба шаҳрвандони кишвар – муҳоҷирони меҳнатӣ дар бораи “Стратегияи миллии Ҷумҳурии Тоҷикистон оид ба муқовимат ба экстремизм ва терроризм барои солҳои 2021-2025» ва «Дар бораи Нақшаи миллии муқовимат ба савдои одамон дар Ҷумҳурии Тоҷикистон» фаҳмонида, қайд карда шуд, ки ҷавонон зиракии сиёсиро аз даст надода ба ҳар гуна гурўҳҳои экстремистӣ – террористӣ шомил нашаванд.

Зимни вохўриҳо бо мусофироне, ки тавассути тайёра ба минтақаҳои гуногуни Федератсияи Россия мераванд, оид ба муқаррароти қонунҳои нави кишвари Россия дар самти муҳоҷирати меҳнатӣ ошноӣ пайдо намуда, муфассал маълумот медиҳанд. Аз суҳбату вохўриҳо сокинони кишвар баҳраманд мегарданд.

Ғайр аз ин, ҳамарўза пеш аз ворид шудани муҳоҷирон ба толори гумрук, бо ҳар яки онҳо дар алоҳидагӣ оид ба будубош, тағйиру иловаҳо дар қонунгузории Федератсияи Россия дар самти муҳоҷирати меҳнатӣ суҳбатҳо намуда, ба онҳо буклетҳо тақдим намуда, онҳоро бори дигар таъкид менамоянд, ки дидаву дониста қонунгузории кишвари қабулкунандаро вайрон накунанд. Пеш аз ҳама, онҳо бояд гирифтани патент, иҷозаи кор ва қайди зистро фаромўш накунанд, ки дар қаламравӣ Россия ошкоро (легально) кору фаъолият намоянд.

Кормандони Шуъба саъю кўшиш намуда истодаанд, ки кумаки хешро нисбати муҳоҷирони меҳнатӣ-шаҳрвандони мамлакат дареғѓ намедоранд. 

Абдуллоев И., Сардори шуъбаи Хадамоти муҳоҷират дар шаҳри Кӯлоб