Бахши Хадамоти муҳоҷират дар ноҳияи Айнӣ дар самти фаъолияти худ корҳои иттилоотиву фаҳмондадиҳиро дар байни сокинони ноҳия ҷиҳати пешгирии ҷавонон ба ҳизбу ҳаракатҳои ифротӣ хуб ба роҳ монда истодааст.
Маврид ба зикр аст, ки тибқи Фармони Президенти Ҷумҳурии Тоҷикистон дар бораи «Стратегияи муқовимат ба экстремизм ва терроризм дар Ҷумҳурии Тоҷикистон барои солҳои 2021-2025» ва дар ин замина фармоиши Сардори Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон аз 9 феврали соли 2023 қабул гардиданд, ки тамоми сохторхои зертобеи Хадамотро баҳри иҷрои он муваззаф намудааст.
Бахши Хадамоти муҳоҷират дар ноҳияи Айнӣ чанде пеш дар толори мақомоти иҷроияи ҳокимияти давлатии ноҳияи Айнӣ вохӯрии судманд бо роҳбарони ташкилоту муассисаҳо ва фаъолони ноҳия, вобаста ба масъалаҳои болозикр доир намуд. Дар он фаъолон, имомхатиби ноҳия, раисони хоҷагӣ ва кумитаи маҳал фаъолона иштирок намуданд.
Зимни вохӯрӣ ба ҳозирин оид ба вазъӣ имрӯза, ки ҷомеаи ҷаҳониро ба ташвиш овардааст, экстремизм ва терроризм сухан ироа намуда, ҳар як нафарро мебояд, ки зиракии сиёсиро аз даст надода ҳушёриро ихтиёр намоянд.
Мо халқи тоҷик имрӯз бояд шукрона кунем, шукронаи тинҷӣ, Истиқлолияти комил, Ваҳдати миллӣ ва шукронаи Пешвои муаззаму маҳбуби миллат кунем, ки дар ватани мо сулҳу субот пойдор аст. Ҳастанд бадхоҳони миллат, ки аз берун луқма партофта мехоҳанд ба сулҳу оромии кишварамон халал эҷод намоянд, вале онҳо муваффақ нахоҳанд шуд. Насли ҷавону қавииродаи тоҷик имрӯзҳо сиёҳро аз сафед ва хубро аз бад фарқ мекунанд ва он бадтинатони хоини Ватан наметавонанд онҳоро гумроҳ бисозанд.
Аз ҳар як иштирокчии ин чорабинӣ, ки бевосита фаъолони ноҳия, роҳбарони ташкилоту муассисаҳо ҳастанд насли наврасу ҷавонро дуруст тарбия намуда ҳиси ватандӯстиву ватанпарастиро дар ботини ҳар як ҷавон бедор созанд, зеро ояндаи ин миллату давлат маҳз дар дасти ҷавонони бо ғайрату далери ин кишвар аст.
Он нафароне, ки фарзандонашон дар муҳоҷирати меҳнатӣ қарор доранд, бо онҳо доим дар тамос бошанд, насиҳаташон кунанд то ба доми чунин бадхоҳони миллат ва он ҷангҷӯёни ифротӣ наафтанд.
Зикр бояд намуд, ки ҳамаи мо бояд пайравӣ ба Пешвои муаззаму маҳбуби миллат намуда дар рушду ободии ҳар як гӯшаи диёр саҳмгузор бошем, аз сиёсати пешгирифтаи имрӯза пуштибон бошем ва ба ҳеҷ ваҷҳ нагузорем ба якпорчагии кишвари маҳбубамон зиёне расад.
Дар фарҷоми вохӯрӣ ба иштирокчиён варақаҳои иттилоотӣ ва булектҳо тақдим карда шуд.
Бахши Хадамоти муҳоҷират дар ноҳияи Айнӣ
