11 июли соли равон дар Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон бо иштироки кормандон ва намояндагони Ҳизби Халқии Демократии Тоҷикистон маҷлиси ҳисоботии ташкилоти ибтидоии ҳизбии “Муҳоҷир” баргузор гардид.
Дар ҷаласаи мазкур масъулин ва намояндаи дастгоҳи марказии Кумитаи иҷроияи Ҳизби Халқии Демократии Тоҷкистон, КИ ҲХДТ дар шаҳри Душанбе ва ноҳияи Шоҳмансур иштирок ва бо нутқи пурмуҳтаво баромад карданд.
Зимни ҳисобот, раиси ташкилоти ибтидоии ҳизбии “Муҳоҷир” Сардори Хадамоти муҳоҷират Нодирзода Иматшо иброз дошт, ки ташкилоти ибтидоии “Муҳоҷир” фаъолияти кории худро дар давраи ҳисоботӣ бо мақсади дар амал татбиқ намудани ҳадафҳои Оинномавию барномавии ҳизб, дастуру супоришҳои Пешвои муаззами миллат, Раиси Ҳизб муҳтарам Эмомалӣ Раҳмон, қарорҳои Кумитаи иҷроияи Ҳизби Халқии Демократии Тоҷикистон дар шаҳри Душанбе ва Кумитаи иҷроияи Ҳизби Халқии Демократии Тоҷикистон дар ноҳияи Шоҳмансури шаҳри Душанбе ба роҳ монда, ҷиҳати татбиқи сиёсати давлатӣ дар самтҳои меҳнат, муҳоҷират, шуғли аҳолӣ ва рушди ҳунармандӣ як зумра корҳои бунёдӣ ба анҷом расонида, бобаргузор намудани корҳои таблиғотиву ташвиқотӣ ҷиҳати татбиқи босамари ҳадафҳои Оиннома ва Барномаҳои ҳизб саҳмгузорӣ намудааст.
Ҳамзамон, дар раванди маҷлис Нодирзода Иматшо, дар бораи ҳамкории бахшу шуъба ва раёсатҳои Хадамот дар шаҳру ноҳияҳои ҷумҳурӣ бо КИ Ҳизби Халқии Демократии Тоҷикистон дар минтақаҳо ҷиҳати роҳандозии корҳои фаҳмондадиҳӣ дар ҷамоату деҳот байни сокинон, аз ҷумла муҳоҷирони меҳнатии ба ватан баргашта, ибрози андеша намуд.
Қайд гардид, ки кормандони Хадамот дар ҳамкорӣ бо намояндагони Ҳизби Халқии Демократии Тоҷикистон корҳои тарғиботӣ бурда, ҳамеша сиёсати сулҳпарваронаи Президенти кишвар муҳтарам Эмомалӣ Раҳмонро ташвиқ менамоянд.
Сипас дар назди ҳозирин Ҳабизода Зоир мудири шуъбаи ташкилӣ ва оид ба кадрҳои дастгоҳи марказии КИ ҲХДТ ва Муродов Ҷурабек муовини раиси КИ ҲХДТ дар шаҳри Душанбе баромад намуда, аз ҷумла, қайд карданд, ки 14-уми декабри соли 2024 ҲХДТ 30 солагии таъсисёбии худро ҷашн мегирад.
Ин муҳлат дар ҳаёти як ҳизби сиёсӣ тулонӣ нест.
ҲХДТ, зодаи тафаккури Пешвои муаззами миллат аст, ва бо назардошти афкору андешаҳои табақаҳову гурӯҳҳои мухталифи ҷомеа таъсис ёфта тавонист, ки дар марҳилаи хело кӯтоҳи таърихӣ ҳамчун ҳизби меҳварӣ орзуву ормонҳои мардумро дар худ таҷассум кунад ва ба ҳизби умумимиллӣ табдил ёбад.
Ҳамин тариқ масъалаҳои дар рӯзномабуда баррасӣ шуда, қарорҳои дахлдор қабул карда шуданд.
Дар фарҷом ба чанд нафар аъзои нави ташкилоти ибтидоии ҳизбии “Муҳоҷир” шаҳодатномаи ҳизбӣ супорида шуд.
Маркази матбуоти Хадамоти муҳоҷират
