Муҳоҷирати меҳнатӣ дар шароити имрӯза тақрибан дар аксари мамлакатҳои чаҳон ба мушоҳида мерасад. Табиист, ки Тоҷикистони мо низ дар ҳамин қатор ҷой дорад. Ҳар сол шаҳрвандони кишвари мо ба шаҳру минтақаҳои гуногуни Федератсияи Россия, Ҷумҳурии Қазоқистон, мамлакатҳои Ховари Миёна ва дигар кишварҳо ба муҳоҷирати меҳнатӣ рафта, аксаран аз рӯи касбҳои коргарӣ ва қисман вобаста ба ихтисосу касбҳои омeхтаашон фаъолият мекунанд.
Барои ба низоми муайян даровардани муҳоҷирати меҳнатӣ ва омeхтану аз худ кардани роҳу усулҳои муҳоҷират Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон, раёсат, шуъбаҳо ва бахшҳои ин Хадамот дар вилояту ноҳияҳо мутасаддӣ мебошанд. Аз ҷумла, дар ноҳияи Панҷ низ бахши Хадамоти муҳоҷират фаъолият дорад, ки кору бори худро дар асоси дастуру тавсияҳо ва ҳуҷҷатҳои меъёрии ҳуқуқӣ, ки аз ҷониби мақомоти болоӣ пешниҳод шудаанд, ба роҳ мондааст.
Бахши Хадамоти муҳоҷират дар ноҳия барои пешбурди кор нақшаи дурнамо, чорабиниҳо таҳия ва тасдиқ намуда, аз рӯи он фаъолият намуда истодааст. Кормандони бахш бо ҷамоатҳои шаҳраку деҳот, корхонаю муассисаҳои калон робитаи наздик дошта, дар асоси нақша ҷамъомадҳо, чорабиниҳои маърифатию омӯзишӣ, вохӯриҳо гузаронида, шаҳрвандонро бо низому тартиб, роҳу усулҳои ба муҳоҷирати меҳнатӣ рафтанро меомӯзонанд.
Ҳамин гуна чорабиниҳо дар ҷамоати шаҳраки Панҷ дар 6 моҳи аввали соли равон 5 вохӯрӣ бо иштироки зиёда аз 143 нафар муҳоҷирон ва аҳли оилаи онҳо, дар ҷамоатҳои деҳоти ба номи Сайфуддинов Кабут ва Нури Ваҳдат 7 вохӯрӣ бо иштироки 202 нафар муҳоҷирону оилаи онҳо гузаронида шуданд.
Вобаста ба ғамхориҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷиҳати дастгирии муҳоҷирони меҳнатӣ шароити ба кор таъмин намудан ва шартҳои муҳоҷират рӯз то рӯз сабуктар гардида, мушкилоти ҷойдошта бартараф хоҳад шуд.
Айни замон бахши Хадамоти муҳоҷират дар ноҳияи Панҷ аз имкониятҳои мавҷуда самаранок истифода бурда, пайваста кӯшиш ба харҷ медиҳад, ки корҳои фаҳмондадиҳиро дар байни шаҳрвандони ҷумҳурӣ – муҳоҷирони меҳнатӣ ҷоннок намуда, ҳамарӯза нисбати онҳо кумаки беғаразонаи худро дареғ намедорад.
Сиҷоъиддин Саидов,
Сардори Бахши Хадамоти муҳоҷират дар ноҳияи Панҷ
