Субҳи 8-уми августи соли ҷорӣ гурӯҳи корӣ дар ҳайати Муовини Раиси Ҳизби Халқии Демократии Тоҷикистон Латифзода Асрор, Сардори Хадамоти муҳоҷирати Вазорати меҳнат, муҳоҷират ва шуғли аҳолии ҶТ Нодирзода Иматшо, инчунин намояндагони ҲХДТ дар ФР, Прокуратураи генералӣ ва Кумитаи ҷавонон ва варзиши назди Ҳукумати ҶТ дар якҷоягӣ бо Консули генералии Ҷумҳурии Тоҷикистон муҳтарам Назарӣ Ҳ.Т. ва Намояндаи Вазорати меҳнат, муҳоҷират ва шуғли аҳолии ҶТ дар шаҳри Санкт-Петербург Ҷонмаҳмадов Ф.Ф. аз вазъи муҳоҷирони меҳнатӣ дар майдони сохтмони биноҳои баландошёнаи ширкати «Setl Group», воқеъ дар суроғаи Проспект Ветеранов 181 дидан намуданд.

Зимни вохӯрӣ бо муҳоҷирони меҳнатӣ суҳбати самимӣ доир гардида, шароити кории онҳо, мушкилиҳои ҷойдошта ва роҳҳои бартараф сохтани онҳо баррасӣ гардиданд. Дар ин росто, ба муҳоҷирони меҳнатӣ як қатор тавсияҳо бобати беҳтар гардонидани шароити будубош дар Федератсияи Россия ва риояи қоидаҳои будубош дода шуданд.

Вохӯрӣ бо донишҷӯён

Нимаи дуюми рӯзи 8-уми август дар маҷлисгоҳи Консулгарии генералии ҶТ дар шаҳри Санкт-Петербург вохӯрии аъзоёни гурӯҳи корӣ, иборат аз Муовини Раиси Ҳизби Халқии Демократии Тоҷикистон Латифзода Асрор, Сардори Хадамоти муҳоҷирати Вазорати меҳнат, муҳоҷират ва шуғли аҳолии ҶТ Нодирзода Иматшо, инчунин намояндагони ҲХДТ дар ФР, Прокуратураи генералӣ ва Кумитаи ҷавонон ва варзиши назди Ҳукумати ҶТ бо донишҷӯёни шаҳри Санкт-Петербург мулоқот анҷом доданд. Дар чорабинӣ роҳбари ташкилоти ҷавонони донишҷӯи Тоҷикистон Ҷумаев Азизбек Додарбекович ва хонандагони муассисаҳои таҳсилоти олии шаҳри номбурда ширкат варзиданд.

Гурӯҳи корӣ бо вазъи феълии донишҷӯён ва мушкилоти онҳо шинос гардиданд. Ҳамчунин, дар рафти суҳбат оид ба нақи ҷавонон, ҳамчун нерӯи созанда дар рушди Ҷумҳурии Тоҷикистон махсусан қайд гардида, ҳозирин ҷиҳати таҳсил ва омӯзиши илмҳои муосир барои хизмати оянда ба халқу Ватан таъкид гардиданд.

Вохӯрӣ бо диаспора

Нимаи дуюми рӯзи 8-уми август мулоқоти гурӯҳи кории намояндагони Ҳизби Халқии Демократии Тоҷикистон, Хадамоти муҳоҷирати Вазорати меҳнат, муҳоҷират ва шуғли аҳолии ҶТ, Прокуратураи генералӣ ва Кумитаи ҷавонон ва варзиши назди Ҳукумати ҶТ бо роҳбарон ва аъзоёни Шӯрои ҳамоҳангсози диаспораҳои шаҳри Санкт-Петербург ва вилояти Ленинград доир гардид.

Дар вохӯрӣ Раиси Шӯрои ҳамоҳангсози диаспораҳои шаҳри Санкт-Петербург ва вилояти Ленинград Бердов Фарҳод Худобердиевич, роҳбарони ташкилотҳои ҷамъиятии «Сомониён», «Аҷам», «Помир», «МОСТ» ва «Занони ҷаҳон», инчунин як қатор фаъолони ҷомеаи шаҳрвандӣ аз ҳисоби ҳамватанони бурунмарзӣ иштирок доштанд.

Зимни мулоқоти самимӣ дархосту пешниҳодҳои роҳбарони ташкилотҳои ҷамъиятӣ ҷиҳати беҳтар гардонидани шароити корӣ ва будубоши муҳоҷирони меҳнатӣ, инчунин роҳҳои таблиғи фарҳанги халқи тоҷик берун аз кишвар шунида шуда, нақшаи фаъолияти муштарак коркард гардид. Дар фарҷоми вохӯрӣ аъзоёни фаъоли ҷомеаи шаҳрвандии шаҳри Санкт-Петербург бо ифтихорномаҳо аз номи Вазири меҳнат, муҳоҷират ва шуғли аҳолии ҶТ барои саҳмгузорӣ ва хизмати самимӣ ба халқу Ватан дар шароити тантанавӣ супорида шуданд.

Вохӯрӣ бо муҳоҷирон

Шоми 8-уми август гурӯҳи корӣ, иборат аз Муовини Раиси Ҳизби Халқии Демократии Тоҷикистон Латифзода Асрор, Сардори Хадамоти муҳоҷирати Вазорати меҳнат, муҳоҷират ва шуғли аҳолии ҶТ Нодирзода Иматшо, инчунин намояндагони ҲХДТ дар ФР, Прокуратураи генералӣ ва Кумитаи ҷавонон ва варзиши назди Ҳукумати ҶТ, бо иштироки Консули генералии Ҷумҳурии Тоҷикистон муҳтарам Назарӣ Ҳ.Т. ва Намояндаи Вазорати меҳнат, муҳоҷират ва шуғли аҳолии ҶТ дар шаҳри Санкт-Петербург Ҷонмаҳмадов Ф.Ф. аз шароити муҳоҷирони меҳнатӣ дар хобгоҳи ширкати «Прайдекс», воқеъ дар суроғаи 9-я Советская дидан намуданд.

Бо муҳоҷирон суҳбати самимӣ доир карда шуда, ба онҳо зарурати риояи қатъии қонунгузории кишвари иқомат, эҳтиром нисбат ба фарҳанг ва канораҷӯӣ аз ҳар гуна ҳаракатҳои тундгаро фаҳмонида шуданд. Инчунин, дар рафти мулоқот саволу ҷавоб вобаста ба мушкилоти муҳоҷирон доир гардида, ба саволҳои додашуда посухҳои пурра ва қаноаткунанда дода шуданд.

Маркази матбуоти Хадамоти муҳоҷират