Чанде пеш муовини раиси вилояти Хатлон Акрам Сулаймонзода бо муовини якуми директори генералии муассисаи давлатии буҷетӣ “ Маркази бисёрсоҳавии муҳоҷират” дар шаҳри Москва Олег Нуждин вохӯрданд.
Дар он ҳамчунин сардори Раёсати Хадамоти муҳоҷират дар вилояти Хатлон Баҳодурҷон Азиззода ва роҳбари намояндагии Муассисаи давлатии буҷетӣ “Маркази бисёрсоҳавии муҳоҷират”-и шаҳри Москва дар Ҷумҳурии Тоҷикистон Абдусатор Нозимов ширкат доштанд.
Акрам Сулаймонзода меҳмононро ба вилояти Хатлон хайрумақдам гуфта, изҳор дошт, ки мақомоти иҷроияи ҳокимияти давлатии вилояти Хатлон барои ҳамкориҳои созанда ҳамеша омодааст.
Олег Нуждин қайд кард, ки мақсад аз сафараш ба вилояти Хатлон муаррифии намояндагии муассиса мебошад.
“Мо бо мақсади ташвиқу тарғиби намояндагии муассисаи давлатии буҷети “Маркази бисёрсоҳавии муҳоҷират”-и Москва дар Ҷумҳурии Тоҷикистон ба минтақаҳои Тоҷикистон сафар намудем. Аз Шумо эҳтиромона хоҳиш мекунем, вобаста ба фаъолияти намояндагии мо ба сокинони кишвар хабар диҳед. Муҳоҷирони тоҷик аз ин баъд метавонанд дар Душанбе ҳуҷҷатҳои худро омода намуда, ба Россия сафар кунанд. Ҳамчунин мо имкон дорем, ки дар ҳаминҷо барои мутахассисони тоҷик дар Россия кор пайдо кунем. Ширкату корхонаҳои русӣ, ки ба коргари кироя эҳтиёҷ доранд ё намояндагияшонро ба инҷо мефиристанд ва ё тариқи маҷозӣ (онлай) бо мутахассисон суҳбати қабл аз қабул ба корро мегузаронанд. Намояндагии мо дар Душанбе имкон медиҳад, ки аз қалобону фиребгароне, ки муҳоҷиронро фиреб медиҳанд ва маблағҳои зиёдашонро мегиранд, эмин нигоҳ дорем. Ғайр аз ин, мо метавонем корхонаю ширкатҳои русӣ ё баръакс тоҷикро, ки мехоҳанд ҳамкори кунанд шинос намуда, вохӯриҳояшонро ташкил кунем”,- қайд кард Олег Нуждин.
Акрам Сулаймонзода иқдоми кушодани намояндаги маркази номбурдаро амали нек гуфта, илова кард, ки барои мо муҳим бехатарии шаҳрвандони тоҷик дар қаламравӣ, Россия мебошад.
Ӯ иброз намуд, ки агар шартномаҳо дар доираи қонунгузорӣ бошад ва корфармоҳои рус кафолати бехатари ва фароҳам овардани шароити иҷтимоии муҳоҷиронро диҳад, мо дастгирию кумаки худро дар ҷалби дастаҷамъона ба муҳоҷирон мерасонем.
Раёсати Хадамоти муҳоҷират дар вилояти Хатлон
