Ҳамарӯза кормандони масъули шуъбаи баҳисобгирӣ ва хизматрасонӣ ба муҳоҷирон дар “Истгоҳи роҳи оҳани шаҳри Душанбе”-и Раёсати Хадамоти муҳоҷират дар шаҳри Душанбе, корҳои фаҳмондадиҳиро бо муҳоҷирони меҳнатӣ – шаҳрвандони ҷумҳурӣ, ки тавассути қатора сафари кишвари Россия доранд, пурзӯр намуда истодаанд.
Кормандони шуъбаи мазкур мунтазам зимни ба сафар рафтан ва аз сафар баргаштани шаҳрвандони мамлакат вохӯрӣ намуда, дар масоили муҳоҷирати меҳнатӣ корҳои фаҳмондадиҳӣ бурда, оид ба камбудиҳо ва проблемаҳои ҷойдошта нисбат ба қонунгузории нави Федератсияи Россия дар самти муҳоҷирати меҳнатӣ, аз ҷумла гирифтани Сертификати донистани забони русӣ, таърих ва қонунгузории кишвари номбурда, Патент, доштани касбу ихтисос суҳбат намуда, ба онҳо маслиҳатҳои муфид медиҳанд.
Дар ҷараёни вохӯриҳо ва пурсишҳо бо шаҳрвандон бештар ба доштани касбу ихтисос ва забондонии онҳо таваҷҷуҳи хоса зоҳир карда мешавад. Барои кӯмак ва ёрии амалӣ расонидан ба муҳоҷирони меҳнатӣ дар “Истгоҳи роҳи оҳани шаҳри Душанбе” брошюраҳо, овезаҳо ба тағйиру иловаҳо оид ба қонунгузории Федератсияи Россия дар самти муҳоҷирати меҳнатӣ, маълумотҳо пешкаш карда, инчунин телефонҳои боварӣ шабонарӯзӣ фаъолият менамояд.
Ҳамзамон, дар рафти вохӯриву суҳбатҳо ба маълумоти шаҳрвандон расонида мешавад, ки дар қонунгузории Федератсияи Россия тағйироти муҳиме ба амал омадааст, ки ба шаҳрвандони хориҷӣ, аз ҷумла муҳоҷирони меҳнатӣ дахл дорад.
Ба самъи шаҳрвандон расонида мешавад, ки марҳилаи дуюми озмоиши санҷиши қоидаҳо ва шартҳои вуруд ба кишвари Россия барои шаҳрвандони хориҷӣ аз 30 июни соли 2025 оғоз ёфтааст.
Хотиррасон карда шуд, ки барои шаҳрвандони хориҷӣ замимаи мобилии ruID дастрасӣ дорад, ки тавассути он шаҳрвандон метавонанд дар портали Хадамоти давлатӣ ҳисоб эҷод кунанд, СНИЛС гиранд ва дар бораи сафари худ ба Федератсияи Россия огоҳинома пешниҳод намоянд.
Инчунин, ба маълумоти шаҳрвандон расонида шуд, ки дар ҳолати пайдо шудани саволҳо дар ин самт метавонанд ба Намояндагии Вазорати меҳнат, муҳоҷират ва шуғли аҳолии Ҷумҳурии Тоҷикистон дар ФР оид ба муҳоҷират муроҷиат намоянд.
Дар анҷоми вохӯрӣ ба саволҳои сершумори муҳоҷирони меҳнатӣ ҷавобҳои қаноатбахш дода шуд.
Раёсати Хадамоти муҳоҷират дар шаҳри Душанбе
