Санаи 27 августи соли равон Сардори Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон Нодирзода Иматшо ҳайати гурӯҳи кории вилояти Томски Федератсияи Россия таҳти роҳбарии муовини губернатори вилояти Томск Грузных Светлана Николаевнаро ба ҳузур пазируфт.
Сараввал Сардори Хадамоти муҳоҷират Нодирзода Иматшо меҳмонони олиқадро хайрамақдам гуфта, ба ҳозирин оид ба фаъолияти Хадамоти муҳоҷират ва зерсохторҳои он дар шаҳру ноҳияҳо ва вилоятҳо, аз ҷумла, дар бораи фаъолияти МД «Марказҳои машваратӣ ва омодагии пеш аз сафари муҳоҷирони меҳнатӣ» дар шаҳрҳои Душанбе, Хуҷанд, Бохтар ва Хоруғ маълумоти мухтассар пешниҳод намуд.
Дар рафти мулоқот Сардори Хадамоти муҳоҷират дар бораи раванди муҳоҷирати меҳнатӣ, вазъи бехатарӣ ва ҳуқуқии шаҳрвандони ҷумҳурӣ, ки айни замон дар Федератсияи Россия фаъолияти меҳнатӣ доранд, вазъият ва дурнамои муҳоҷират, касбомӯзии муҳоҷирон, донистани забонҳои хориҷӣ, аз ҷумла омӯзиши забони русӣ, андешаронӣ намуд.
Дар навбати худ муовини губернатори вилояти Томск Грузных Светлана Николаевна иброз дошт, ки ҳадаф аз сафари мазкур ба Хадамоти муҳоҷират, ин ташкил намудани Марказҳои тестӣ дар шаҳри Душанбе ва Хуҷанд барои шаҳрвандони Ҷумҳурии Тоҷикистон, ҷиҳати супоридани имтиҳонот ва гирифтани Сертификат аз забони русӣ, таъриху тамаддун ва қонунгузории Федератсияи Россия тариқи онлайн мебошад. Ин имконият медиҳад, ки шаҳрвандони Ҷумҳурии Тоҷикистон ба ин Марказҳо омада бе мамоният барои гирифтани Сертификат имтиҳонот супоранд.
Инчунин, иброз намуд, ки айни замон дар Тоҷикистон ягона Маркази сершуғли аҳолӣ кушода шудааст, ки тамоми хоҳишмандонро қаноат карда наметавонад. Аз ин лиҳоз, мо тамос гирифтем, ки чунин Марказҳои тестиро, ки фаъолияти онҳо тариқи онлайн баргузор мегардад, дар Хадамоти муҳоҷират ташкил намоем.
Ҳамзамон, Светлана Николаевна махсус қайд намуданд, ки баъди ба хулосаи ягона омадани Тарафҳо байни Хадамоти муҳоҷират ва Донишгоҳи давлатии Томск Созишномаи ҳамкорӣ баста мешавад.
Дар фарҷоми мулоқот ҳайати гурӯҳи кории вилояти Томск таҳти роҳбарии муовини губернатори вилояти Томск Грузных Светлана Николаевна аз фаъолияти МД “Марказҳои машваратӣ ва омодагии пеш аз сафари муҳоҷирони меҳнатӣ” ва бинои нави Хадамот, ки айни замон сохтмони идома дорад, дидан намуданд. Вохӯрӣ дар фазои дӯстона ва ҳусни тафоҳум баргузор гардид.
Маркази матбуоти Хадамоти муҳоҷират
