Дар меҳмонхонаи Атласи пойтахт ҷаласаи корӣ ҷиҳати баррасии масъалаҳои ҳалталаб вобаста ба пешгирии паҳншавии ВНМО дар шаҳри Душанбе баргузор гардид.
Дар ҷаласаи корӣ намояндагони муассисаҳои давлатӣ, аз ҷумла Раёсати Хадамоти муҳоҷират дар шаҳри Душанбе ва ташкилотҳои ҷамъиятӣ, ки дар соҳаи пешгирии ВНМО, табобат, нигоҳубин ва дастгирӣ фаъолият мебаранд, дар шакли муқаррарӣ ва маҷҷозӣ (онлайн) иштирок карданд.
Зимни чорабинӣ иштирокчиён вазъи эпидемиологии ВНМО дар шаҳри Душанбе, масъалаҳои мусоидат ба дастрасии ҳамаҷониба ба хизматрасониҳо оид ба ВНМО ва коҳиши зарар барои шахсони истифодабарандаи маводи мухаддири тазриқиро мавриди муҳокима қарор доданд, инчунин оид ба роҳҳои ҷалби истеъмолкунандагони маводи мухаддир ба барномаи табобати ҷойивазкунии Метадон ва риояи реҷаи табобат табодули таҷриба ва афкор намуданд.
Ҳамзамон натиҷаҳои татбиқи лоиҳаи “Мустаҳкамкунии шароити мусоид ва васеъ намудани миқёси чорабиниҳои профилактикӣ, табобат ва нигоҳубин барои нигоҳ доштани паҳншавии эпидемияи ВНМО дар Ҷумҳурии Тоҷикистон” – ро, ки аз ҷониби Барномаи рушди СММ дар Тоҷикистон бо дастгирии Фонди Глобалии Мубориза бар зидди ВНМО, сил ва вараҷа маблағгузорӣ шудааст, муаррифӣ намуданд.
Бояд тазаккур дод, ки ҷаласаи мазкур низ дар доираи ҳамин лоиҳа ташкил гардидааст.
Раёсати Хадамоти муҳоҷират дар шаҳри Душанбе
