Дар Хадамоти муҳоҷират ҷаласаи корӣ назди муовини якуми Сардори Хадамоти муҳоҷират Шарифзода Маҳмадсалим Пир баргузор гардид, ки дар он мудирони бахшу шуъбаҳои Хадамоти муҳоҷират дар шаҳру ноҳияҳои тобеи ҷумҳурӣ иштирок намуданд.
Дар ҷаласаи мазкур як масъала, дар амал татбиқ намудани масъалаҳои муҳоҷирати меҳнатии шаҳрвандони ҷумҳурӣ дар Федератсияи Россия, баррасӣ гардид.
Бояд тазаккур дод, ки дар моҳи феврали соли 2025 ба як қатор санадҳои меъёрии ҳуқуқии Федератсияи Россия дар соҳаи муҳоҷирони меҳнатӣ тағийру иловаҳо ворид карда мешавад, ки баъди қувваи қонунӣ пайдо намудани онҳо, аз 5 феврали соли 2025, 124 ҳазор нафар шаҳрвандони Тоҷикистон дар Федератсияи Россия ҳамчун муҳоҷирони ғайриқонунӣ қарор мегиранд ва дар руйхати сиёҳ сабт шуда, аз қаламрави Федератсияи Россия берун карда мешаванд.
Бинобар ин, тибқи супориши Роҳбари давлат ва Вазири меҳнат, муҳоҷират ва шуғли аҳолии Ҷумҳурии Тоҷикистон, Хадамоти муҳоҷират ва сохторҳои онро зарур аст, ки ҷиҳати муайян намудани макони зисти 124 ҳазор нафар шаҳрандони Тоҷикистон, ки дар Федератсияи Россия ҳамчун муҳоҷирони ғайриқонунӣ қарор доранд, тариқи хона ба хона гашта, ҷиҳати расмикунонии будубоши минбаъда онҳо дар қаламрави Федератсияи Россия, корҳои фаҳмондадиҳӣ ба роҳ монда шавад.
Дар ҷаласа махсус қайд карда шуд, ки аз 5 феврали соли 2025 ба мақомоти ҳифзи ҳуқуқи Федератсияи Россия имконияти зиёд дода мешавад, ки бе ҳалномаи суд муҳоҷирони ғайриқонунӣ ва дигар шаҳрандоне, ки бе иҷозат дар Федератсияи Россия иқомат доранд, аз ҳудуди ин давлат берун (депорт) намоянд.
Инчунин, тибқи санадҳои меъёрии ҳуқуқие, ки 5 феврали соли 2025 қувваи қонуни пайдо мекунанд, бе ҳуҷҷатгузорӣ (бе патент) дар муддати 90 шабонарӯз соли тақвимӣ метавонанд фаъолият кунанд, инчунин феҳристӣ байқайдгирии шахсони назоратшаванда ҷорӣ карда мешавад, ки шаҳрванд наметавонад бе иҷозати мақомоти дахлдор ҷойи зисташро иваз намояд.
Вобаста ба масъалаи мазкур ба мудирони бахшу шуъбаҳои Хадамоти муҳоҷират дар шаҳру ноҳияҳои тобеи ҷумҳурӣ супориш дода шуд, ки бо ҷалби сохторҳои дахлдор корро дар ин самт, ҷоннок намоянд.
Дар ҳолати муайян кардани шаҳрвандон, ки дар ҳудуди ҷумҳурӣ ва Федератсияи Россия қарор доранд, ҷиҳати чораҳои андешидашуда, ба дастгоҳи марказии Хадамоти муҳоҷират ва Вазорати меҳнат, муҳоҷират ва шуғли аҳолии Ҷумҳурии Тоҷикистон маълумот пешниҳод намоянд.
Маркази матбуоти Хадамоти муҳоҷират
