Солҳои охир яке аз мушкилиҳое, ки имрӯз тамоми ҷомеаи ҷаҳониро ба ташвиш андохтааст, ин экстремизм, терроризм ва дигар зуҳуроти номатлуби ҷомеа ба шумор меравад. Дар ҳақиқат барои ба ҳадафҳои сиёсӣ расидан аксаран ташкилотҳои экстремистӣ ба эътиқоди динии одамон таъсир расонида, шаҳрвандони синну соли гуногунро бовар кунониданӣ мешаванд, ки сиёсати давлатдорӣ бар зидди ақидаҳои динии онҳост.
Лозим ба ёдоварист, ки аслан ба чунин гурӯҳҳо ҷавонон дохил мешаванд, ки бо каме таъсиррасонӣ баъзеи онҳо қурбони чунин ифротгароён мегарданд.
Имрӯз ҷавонони моро лозим аст, ки ба дурӯғу бӯҳтони чунин ашхоси ифротӣ бовар накарда, зиракии сиёсиро аз даст надиҳанд. Ташкилотҳои экстремистию террористии фаъолияташон дар Ҷумҳурии Тоҷикистон манъшуда бо ин сохторҳо робитаҳои устувор дошта, дорои сарчашмаҳои маблағгузорӣ ва таҷрибаи пешбурди фаъолияти тахрибкорию террористӣ мебошанд.
Бояд тазаккур дод, ки ҳаракатҳои террористӣ дар миқёси олам гуногун буда, онҳоро асосан ду унсури умумӣ бо ҳам муттаҳид мекунад: аввалан, барои халалдор сохтани амнияти ҷамъиятӣ ва суст намудани пояҳои ҳокимияти давлатӣ равона гардидааст ва дигар ин, ки ин ҳаракатҳо дар байни аҳолӣ ҳиссиёти тарс, оҷизиро ба вуҷуд меоваранд.
Мақсади ибтидоии терроризм халалдор сохтани амнияти ҷамъиятӣ, тарсонидани одамон, ба воҳима ва таҳлука овардани аҳолӣ буда, тавассути он фишор овардан ба мақомоти давлатист. Чунин ҳаракатҳо мақсади ниҳоии ҷинояткорон дар маҷбур сохтани мақомоти давлатӣ барои қабули қарори ғайриҳуқуқӣ мебошад, ки ба манфиати онҳост ва ё бо мақсади резонидани обрӯ ва манзалати мақомоти давлатист.
Мутаассифона, дар натиҷаи чунин амалиёти террористии бо номи исломиён шумораи зиёди аҳолии бегуноҳ ба ҳалокат расида, нисбат ба дини мубини ислом ҳисси бадбинии мардуми ғайримусулмонро ба вуҷуд оварда, барои пешрафти давлатҳои мусулмонӣ монеаҳои ҷиддӣ эҷод намуда истодааст.
Паёмадҳои амалҳои тундгароӣ, ифротгароӣ ва террористӣ бешубҳа, на ба манфиати башарият ва на ба манфиати халқҳои мусулмонии дунё мебошад. Хисороти моддию маънавӣ дар натиҷаи содир намудани амалҳои террористӣ низ беҳисоб аст.
Ятимова Муқаддамбону,
Мутахассиси шуъбаи қабул ва маслиҳатдиҳӣ Раёсати Хадамоти муҳоҷират дар шаҳри Душанбе
