Вохӯрии навбатӣ дар Ҷамоати деҳоти Танобчии ноҳияи Темурмалик бо иштироки 130 нафар сокинони ҷамоат, аз ҷумла муҳоҷирони меҳнатӣ ва аъзои оилаи онҳо баргузор гардид.

Дар вохӯрӣ намояндагони мақомоти иҷроияи ҳокимияти давлатии ноҳия, намояндагони ШВКД, бахши Хадамоти муҳоҷират, кор бо ҷавонон ва варзиши ноҳия ширкат намуда, баромад намуданд.

Зимни баромад мудири бахши Хадамоти муҳоҷират дар ноҳияи Темурмалик Баҳодур Сафарзода оид ба расмикунонии будубоши шаҳрвандони Ҷумҳурии Тоҷикистон дар Федератсияи Россия маълумот дода, таъкид намуд, ки муҳоҷирони меҳнатӣ дар ин кишвар ба марказҳои бисёрсоҳавии муҳоҷирати шаҳри Москва ва Намояндагии Вазорати меҳнат, муҳоҷират ва шуuли аҳолии Ҷумҳурии Тоҷикистон дар ФР оид ба муҳоҷират муроҷиат намуда ҳуҷатгузориашонро дуруст ба роҳ монанд.

Ҳамзамон ӯ дар бораи муқовимат ба экстремизм ва терроризм сухан гуфта, иброз намуд, ки шаҳрвандони ҷумҳурӣ, аз ҷумла муҳоҷирони меҳнатӣ, ки бисёри онҳоро ҷавонон ташкил медиҳад, ҳангоми дар муҳоҷирати меҳнатӣ будан, бо шахсони тасодуфӣ шиносоӣ пайдо накунанд, худро аз шахсони ба фаъолияти экстремистӣ ва террористӣ даст дошта, канора гиранд.

Инчунин, дар бораи пешгирӣ намудани бемориҳои сироятӣ дар муҳоҷират ба монанди ВИЧ/СПИД ва дигар намудҳои касалиҳои сироятӣ ибрози ақида намуд.

Дар чорабинии мазкур намояндагони ШВКД ва бахши кор бо ҷавонон ва варзиши ноҳия оид ба тарбияи насли наврас, исрофкорӣ накардан, аз ҳолу аҳволи фарзандони дар муҳоҷират буда бо хабар будан, суханронӣ намуданд.

Дар рафти суҳбат саволу ҷавобҳо оиди будубоши муҳоҷирони меҳнатӣ, дар Федератсияи Россия тарзи дуруст ба роҳ мондани ҳуҷатгузорӣ, гирифтани патент, иҷозатномаи корӣ ва интизоми меҳнат суҳбатҳо доир гашт.
Аз ҷониби баромадкунандагон ба саволҳои сершумори иштирокчиён ҷавобҳои мушшахас дода шуд.

Чунин вохӯриву мулоқотҳо бо сокинони Ҷамоату деҳоти ноҳияи Темурмалик мунтазам гузаронида мешавад.

Бахши Хадамоти муҳоҷират дар ноҳияи Темурмалик