Бо ибтикори Шуъбаи Хадамоти муҳоҷират дар ҳамбастагӣ бо Бахши кор бо ҷавонон ва варзиш ва КИ ҲХДТ дар шаҳри Турсунзода вохӯрии судманд бо омӯзгорону хонандагон ва волидайни онҳо дар Муассисаҳои таҳсилоти миёнаи умумии № 48,10, 65 ва 119-и деҳаҳои Исмоили Сомонӣ, Иттифоқ, Карл Маркс ва Тойчии шаҳри Турсунзода баргузор намуданд.
Дар оғоз баромадкунандагон дар бораи муҳтавои Паёми Асосгузори сулҳу Ваҳдати миллӣ-Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон суханронӣ намуда, зикр намуданд, ки Паёми имсолаи Президенти Ҷумҳурии Тоҷикистон, муҳтарам Эмомалӣ Раҳмон ба Маҷлиси Олии Ҷумҳурии Тоҷикистон бо рӯйдодҳои ниҳоят муҳиму хотирмон барои мардуми шарифи Тоҷикистон ва давлати соҳибистиқлоли тоҷикон соли воқеан таърихӣ буд.
Қайд гардид, ки “Ҳар як фарди баномуси Ватан бояд шукронаи ин сарзаминро карда, ба қадри ин ҳама ободиву пешравиҳо бирасем, зеро имруз халқи кишвар таҳти роҳбарии Сарвари муаззами кишвар зиндагии орому осуда дошта, мулк ободу дастурхони мардум пурнозу неъмат аст.”
Аз лаҳзаҳои муносиб истифода бурда, мудири шуъбаи Хадамоти муҳоҷират дар шаҳри Турсунзода Одиназода Аҳлиддин ба ҳозирин оид ба муҳоҷирати бехатар, будубоши шаҳрвандони ҷумҳурӣ дар хориҷи кишвар, аз ҷумла Федератсияи Россия сухан гуфта, қайд кард, ки пеш аз сафар ҳар сокини ҷамоату деҳотӣ шаҳри Турсунзода хуб омода шуда, баъд ба сафар барояд. Пеш аз ҳама доштани касби муносиб, ки мутобиқ ба бозори кишвари қабулкунанда бошад, гирифтани Сертификати донистани забони русӣ, таърих ва қонунгузории кишвари қабулкунанда, инчунин доштани Патент, қайди муваққатӣ ва дигар ҳуҷҷатҳои лозима аст.
Дар баромади худ оид ба пешгирӣ ва шомилшавии ҷавонон ба ҳизбу ҳаракатҳои ифротӣ сухан намуда, арз намуд, ки мақсади ҳар як давлат ва роҳбарияти сиёсии он ташкилу таъмини ҳаёти хушу хуррам ва осудаву оромии халқу диёраш, сарсабзӣ ва сарбаландии миллаташ дар арсаи байналмилалӣ мебошад. Вале барои ба ин ҳадафҳои воло расидан ғайриихтиёр монеаҳои зиёд пеш меоянд, ки барои рафъи онҳо кӯшишҳои дастаҷамъонаи зиёде лозиманд. Мавриди зикр аст, ки инсоният имрӯз ба хатарҳои навӣ глобалӣ, аз қабили экстремизм, терроризм, паҳншавии маводи мухаддир, буҳронӣ ҷаҳонии молиявӣ ва дигар хатарҳои нав ба нав рӯ ба рӯст.
Баромадкунандагон дар атрофи татбиқи Қонунҳои Ҷумҳурии Тоҷикистон “Дар бораи танзими анъана ва ҷашну маросимҳо”ва “Дар бораи масъулияти падару модар дар таълиму тарбияи фарзанд” сухан гуфта, аз ҷумла, қайд намуданд, ки қонуни мазкур тамоми расму оинҳои миллиро ба танзим дароварда, ба халқу Ватан манфиати бузург расонид. Инчунин, пурзӯр намудани масъулияти падару модар дар таълиму тарбияи фарзанд, дар руҳияи ватандӯстӣ, ифтихори ватандорӣ, эҳтиром ба арзишҳои миллӣ тарбият намудани наврасону ҷавонон низ суханронӣ намуданд.
Дар фарҷом, оид ба масъалаҳои ҷорӣ миёни меҳмонон ва омӯзгорону хонандагон ва волидайни онҳо саволу ҷавоб ва мубодилаи афкор сурат гирифт.
Шуъбаи Хадамоти муҳоҷират дар шаҳри Турсунзода
