Тибқи фармоиши Сардори Хадамоти муҳоҷират гурӯҳи корӣ Хадамоти таъсис ёфт, ки ҷиҳати гузаронидани санҷишҳо, бурдани назорати ғайринавбатии шабонарӯзӣ аз рӯи фаъолияти кормандони навбатдорӣ Раёсати Хадамоти муҳоҷират дар шаҳри Душанбе, ки дар ҶСК “Фурудгоҳи байналмилалии шаҳри Душанбе” ва ҶСК “Роҳи оҳани шаҳри Душанбе” кору фаъолият доранд, бомаром идома дорад.

Чунин вохӯрии навбатӣ дар Фурудгоҳи байнамилалии шаҳри Душанбе бо иштироки бевоситаи гурӯҳи корӣ Хадамот, ки ба он сармутахассиси шуъбаи муҳоҷирати меҳнатӣ ба хориҷа Ҳусейнов У., сармутахассиси Раёсати ҳуқуқ, кадр ва корҳои махсус Юсуфалиев Б., ва мутахассиси пешбари шуъбаи пешгирии муҳоҷирати ғайриқонунӣ Носиров Ш., шомил буданд, ба шаҳрвандони ҷумҳурӣ дар атрофи қоидаҳои будубош дар кишвари қабулкунанда ва шомил нашудан ба ҳаргуна ҳизбу ҳаракатҳои ифротӣ суханронӣ намуданд.

Дар рафти мулоқот бо шаҳрвандон оид ба вазъи имрӯзаи кишвари Федератсияи Россия дар самти муҳоҷират иброз намуда, қайд карданд, ки нафароне, ки барои фаъолияти меҳнатӣ ба ин кишвар мераванд, ҳатман қоидаҳои будубош, гирифтани патент, қайди муваққатӣ ва дигар ҳуҷҷатҳои лозимаро дошта бошанду қонунгузории ин давлати қабулкунандаро бе чуну чаро рияоя намоянд.

Ҳамзамон дар рафти суҳбат, чанд сухан дар бораи мафҳуми экстремизм ва терроризм сухан гуфта иброз намуданд, ки Президенти Тоҷикистон, муҳтарам Эмомалӣ Раҳмон дар мулоқот бо фаъолон, намояндагони ҷомеа ва ходимони дини кишвар санаи 9-уми марти соли равон таъкид намуд, ки “дар се соли охир 24 нафар шаҳрвандони мо дар 10 кишвари дунё ба амалҳои террористӣ, аз ҷумла дар анбӯҳи одамон таркондани худ даст задаанд”.

Ба гуфтаи роҳбари давлат бар асари ташвиқоти густурдаи экстремистӣ тавассути шабакаҳои иҷтимоӣ ва ҳангоми дар муҳоҷирати меҳнатӣ қарор доштани шаҳрвандон шомилшавии ҷавонон ба ташкилоти экстремистиву террористии “Давлати исломӣ” ва дигар гурӯҳҳои террористӣ, сафарбар гардидани онҳо ба минтақаҳои даргир афзудааст.

Як аз сабабҳои шомил шудани ҷавонон, ин интернет мебошад, ки василаи осони ҷалби ҷавонони гумроҳ ба гурӯҳҳои ифротӣ аст.

Дар Тоҷикистон бо қарорҳои Суди Олӣ фаъолияти 28 ташкилоти экстремистиву террористӣ манъ шудааст ва пайвастану ҳамкорӣ намудан бо онҳо мамнуъ буда, ҷавобгарии ҷиноятӣ дорад.

Ягона роҳи пешгирӣ аз чунин зуҳурот ин бо муҳиту андешаи солим фаро гирифтани қишри муҳоҷирони меҳнатӣ аст.

Солҳои охир таҷриба мешавад, ки вазорату идораҳо, ташкилотҳои ҷамъиятӣ ва иттиҳодияҳои динӣ гурӯҳҳои корӣ таъсис дода, барои вохӯрӣ бо муҳоҷирони меҳнатӣ сафарбар месозанд.

Албатта, ин иқдоми бениҳоят муҳим мебошад.

Кор дар ин самт идома дорад.

Маркази матуботи Хадамоти муҳоҷират