14-уми октябри соли равон дар Хадамоти муҳоҷират маҷлиси ҷамъбастии натиҷаҳои фаъолияти Хадамоти муҳоҷират дар нуҳ моҳи соли 2024 ва вазифаҳои минбаъда баргузор гардид.
Дар кори ҷаласа муовини Вазири меҳнат, муҳоҷират ва шуғли аҳолии Ҷумҳурии Тоҷикистон Нодирӣ Шаҳноза Анвар, Сардори Хадамоти муҳоҷират Нодирзода Иматшо, муовинони сардори Хадамот, сардорони раёсатҳо дар шаҳри Душанбе, вилоятҳои Суғду Хатлон, шуъба ва бахшҳои он дар ноҳияҳои тобеи ҷумҳурӣ, директорони МД «Марказҳои машваратӣ ва омодагии пеш аз сафари муҳоҷирони меҳнатӣ» иштирок доштанд.
Дар ҷаласа муовини якуми Сардори Хадамоти муҳоҷират Шарифзода Маҳмадсалим Пир аз рӯи натиҷаҳои фаъолияти ҷамъбасти нуҳмоҳаи соли 2024 маърӯза намуда, қайд карданд, ки ҷиҳати иҷрои қарори Ҳукумати Ҷумҳурии Тоҷикистон “Дар бораи Стратегияи танзими равандҳои муҳоҷират дар Ҷумҳурии Тоҷикистон барои давраи то соли 2040”, тибқи супориши вазорат, Нақшаи чорабиниҳои Хадамоти муҳоҷират оид ба амалисозии марҳилаи якум барои солҳои 2023-2025-и Стратегияи болозикр омода гардида аз 24 июли соли 2023, № 39 бо фармоиши сардори Хадамоти муҳоҷират тасдиқ гардид.
Нақша – чорабиниҳои мазкур аз 57 банд иборат буда, барои иҷрои онҳо саривақт ба ҳамаи кормандони дастгоҳи марказии Хадамоти муҳоҷират ва сохторҳои он дар шаҳру ноҳияҳои ҷумҳурӣ супориш дода шуд.
Иҷрои бандҳои Стратегияи мазкур таҳти назорати Хадамоти муҳоҷират қарор дорад. Стратегияи мазкур санади ягонаи меъёрии ҳуқуқӣ мебошад, зеро бори аввал дар амалия дар доираи як Стратегияи муҳоҷират ҳамаи намудҳои муҳоҷирати аҳолӣ, ки қонунӣ дар қаламрави як кишвар ба амал бароварда мешаванд, баррасӣ карда мешаванд.Оид ба моҳият, ҳадаф ва вазифаҳои Стратегияи мазкур мунтазам баромадҳо, машғулиятҳо ва семинарҳо гузаронида мешавад.
Бояд қайд кард, ки солҳои охир бо мақсади тақвияти ҳифзи ҳуқуқу манфиатҳои муҳоҷирони меҳнатӣ – шаҳрвандони Ҷумҳурии Тоҷикистон дар кишварҳои хориҷа, истифодаи самараноки қувваи корӣ дар дохил ва хориҷи кишвар ва татбиқи сиёсати диверсификатсияи (гуногунсамтии) муҳоҷирати меҳнатии шаҳрвандони Ҷумҳурии Тоҷикистон ба хориҷа бо як қатор давлатҳои хориҷа созишномаҳои марбутаи ҳамкорӣ баста шуданд.
Аз ҷумла, 3 феврали соли 2019 Созишнома байни Ҳукумати Ҷумҳурии Тоҷикистон ва Ҳукумати Давлати Қатар оид ба танзими қувваи корӣ дар Давлати Қатар ба имзо расонида шуд. Созишномаи мазкур аз 2 апрели соли 2020 эътибор пайдо намуда, тибқи нақшаи корӣ 18 ноябри соли 2020 ҷаласаи нахустин гурӯҳи кории муштарак оид ба амалӣ намудани созишнома тавассути муоширати визуалӣ баргузор гардид.
Ҳамзамон, 6 феврали соли 2023 Вазири меҳнати Давлати Қатар ҷиҳати дар амал татбиқ намудани созишномаи болозикр ба Ҷумҳурии Тоҷикистон ташриф намуд.
Мулоқот бо Вазири меҳнати Давлати Қатар таҳти роҳбарии Вазири меҳнат, муҳоҷират ва шуғли аҳолии Ҷумҳурии Тоҷикистон Ҳасанзода Гулнора Кенҷа доир гардид, ки дар он масъалаҳои рушди минбаъдаи ҳамкорӣ дар соҳаи муҳоҷират, мусоидат ба рушди муносибатҳои дуҷониба байни Хадамоти муҳоҷират, муассисаҳои давлатии «Марказҳои машваратӣ ва омодагии пеш аз сафари муҳоҷирони меҳнатӣ» дар шаҳри Душанбе, «Агентии бокортаъминкунӣ дар хориҷа» ва Вазорати меҳнати Давлати Қатар баррасӣ гардиданд. Кор дар ин самт идома дорад.
Раисикунандаи ҷаласа Нодирзода Иматшо аз сардорони раёсатҳо, шуъбаву бахшҳо ва директорони МД «Марказҳои машваратӣ ва омодагии пеш аз сафари муҳоҷирони меҳнатӣ» дар шаҳри Душанбе, ва вилоятҳои Суғду Хатлон роҷеъ ба масъалаҳои ҷойдошта пурсиш ба амал оварда, баҳри бартараф намудани камбудиҳо дар муҳлатҳои кўтоҳтарин ба масъулин дастуру супоришҳои мушаххас доданд.
Дар интиҳо муовини Вазири меҳнат, муҳоҷират ва шуғли аҳолии Ҷумҳурии Тоҷикистон Нодирӣ Шаҳноза Анвар аз фаъолияти Хадамоти муҳоҷират изҳори қаноатмандӣ карда, барои фаъолияти минбаъда вазифагузорӣ намуда, ҷиҳати бартараф намудани мушкилоти камбудиҳои ҷойдошта ба масъулин дастурҳои мушаххас дод.
Маркази матбуоти Хадамоти муҳоҷират
