Бо мақсади шарҳу тавзеҳи қонунҳои Ҷумҳурии Тоҷикистон “Дар бораи тарбияи ватандӯстии шаҳрвандон”, “Дар бораи танзими ҷашну маросим дар Ҷумҳурии Тоҷикистон”, “Дар бораи масъулият барои таълиму тарбияи кӯдак” ва “Дар бораи уҳдадории ҳарбӣ ва хизмати ҳарбӣ” бо иштироки намояндагони сохторҳои Мақомоти иҷроияи ҳокимияти давлатии ноҳияи Кушониён вохӯрии судманд бо фаъолон, сокинон ва муҳоҷирони ба ватан бозгашта доир гардид.
Баромадкунандагон зарурати қабули қонунҳои мазкурро ба таври муфассал шарҳу тавзеҳ дода, таъкид намуданд, ки мо бояд ҷашну маросимҳоро дар доираи талаботи қонунгузорӣ баргузор намоем. Инчунин, ёдрас карда шуд, ки тақлиди кӯр-кӯрона ба фарҳанги бегона, надонистани таъриху фарҳанги миллат, сабақ нагирифтан аз гузаштаи таърих, аз мутолиа ва китобхонӣ дур мондани насли наврас ва бовар кардан ба таассубу хурофот метавонад ҷомеаи мутамаддини моро ба нобудӣ барад ва теша дар решаи ҳастии миллат занад.
Гуфта шуд, ки маҳз бо ҷаҳду талош ва заҳматҳои шабонарӯзии Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар зарфи начандон зиёд Тоҷикистони азизи мо аз вартаи ҷанги таҳмилии шаҳрвандӣ берун омад, мардум сарҷамъ гардид, сулҳу суботи сартосарӣ пойдор шуд ва садҳо корхонаҳои нав бунёд гардида, иншооти гуногуни соҳаи маорифу тандурустӣ сохта, ба истифода дода шуданд ва Ватани маҳбуби мо ба ин васила ободу зебо гардида, сатҳи зиндагии мардум рӯ ба беҳбудӣ овард. Ҳамаи ин дастовардҳо маҳз дар натиҷаи қабули саривақтии қонунҳо ва риояи талаботи онҳо аз ҷониби мардум ба даст омаданд. Инчунин, ба ҳозирин тағйиру иловаҳо дар қонунгузории Федератсияи Россия дар самти муҳоҷират муфассал ироа гардид.
Ҳамзамон, аз кулли иштирокчиён даъват ба амал оварда шуд, ки ҷавонони ноҳия бояд донишҳои худро такмил диҳанд, нозукиҳои техника ва технологияи ҳозиразамонро омӯзанд, ба қадри дастовардҳои замони Истиқлоли давлатӣ расида, тинҷию оромӣ ва ваҳдату ягонагиро мисли гавҳараки чашм ҳифз намоянд, муттаҳид гардида, бар зидди тамоми зуҳуроти номатлуби ҷомеа мубориза баранд ва бо амалигардонии панду андарзҳои бузургон парчамбардори Ватан шаванд.
Дар фарҷоми вохӯрӣ миёни баромадкунандагон ва иштирокчиён мубодилаи афкори судманд сурат гирифт.
Раёсати Хадамоти муҳоҷират дар вилояти Хатлон
