Дар доираи Моҳвораи ҷавонон бахшида ба 23 май Рӯзи ҷавонони Тоҷикистон ва 25 май Рӯзи ҷаҳонии футбол, ки санаи 21 майи соли равон Раёсати кор бо ҷавонон ва варзиши назди Ҳукумати Ҷумҳурии Тоҷикистон дар шаҳри Душанбе дар якҷоягӣ бо Вазорати меҳнат, муҳоҷират ва шуғли аҳолӣ ва сохторҳои он дар шаҳру ноҳияҳои ҷумҳурӣ ярмаркаи ҷойҳои кории холӣ ва вазифаҳои озодро барои ҷавонон ва муҳоҷирони ба ватан бозгашта дар шаҳри Душанбе дар ноҳияи Шоҳмансури пойтахт хиёбони Рӯдакӣ 10, дар назди Маркази савдои Садбарг баргузор намуд.
Дар ярмаркаи мазкур кормандони Раёсати кор бо ҷавонон ва варзиши шаҳри Душанбе, Вазорати меҳнат, муҳоҷират ва шуғли аҳолии Ҷумҳурии Тоҷикистон, Хадамоти муҳоҷират, МД “Марказҳои машваратӣ ва омодагии пеш аз сафари муҳоҷирони меҳнатӣ”, Раёсати Агентии меҳнат ва шуғли аҳолии шаҳри Душанбе иштирок намуданд.
Ҳадаф аз баргузории чунин ярмаркаҳо таъмин намудани ҷавонон, муҳоҷирони меҳнатии ба ватан бозгашта ба ҷойи кори доимӣ ва сокинони бекасб ба шуғли пурмаҳсул мебошад. Дар ярмаркаи мазкур зиёда аз се ҳазор вакансияи ҷойҳои кории холӣ пешниҳод гардида, беш аз 50 муассиса ва ташкилоти шаҳри Душанбе иштирок намуданд.
Ҳамзамон, дар ҷараёни ярмарка аз ҷониби кормандони масъули Хадамоти муҳоҷират ва МД “Марказҳои машваратӣ ва омодагии пеш аз сафари муҳоҷирони меҳнатӣ” корҳои фаҳмондадиҳӣ оид ба ҷалби шаҳрвандон барои кор дар хориҷи кишвар, инчунин дар ширкатҳои сохтмонии Ҷамъияти Саҳомии Кушодаи Неругоҳи Барқи Обии «Роғун» ба роҳ монда, маслиҳатҳои муфид дода шуд.
Аз ҷумла, ба таваҷҷуҳи шаҳрвандон расонида шуд, ки тибқи Фармони Президенти Федератсияи Россия аз 28 апрели соли 2025, таҳти №272 “Оиди ворид намудани тағйироту илова ба Фармони Президенти Федератсияи Россия аз 30 декабри соли 2024, № 1126”, муҳлати қонунигардонӣ дар Федератсияи Россия то 10 сентябри соли 2025 тамдид карда шуд.
Шаҳрвандони Ҷумҳурии Тоҷикистон, ки дар қаламрави Федератсияи Россия бе ҳуҷҷати расмӣ қарор доранд, имконият доранд, ки то санаи 10 сентябри соли 2025 ҳуҷҷатҳои худро ба расмият дароранд. Инчунин, дар чорабинӣ оид ба пешгирии шомилшавии ҷавонон ба ҳизбу ҳаракатҳои ифротӣ, муҳоҷирати бехатар, экстремизму терроризм, пешгирии савдои одамон ва дигар масъалаҳои мубрами рӯз, суханронӣ карда шуд.
Дар фарҷом ба иштирокдорон варақаҳои иттилоотӣ оид ба муҳоҷирати меҳнатӣ тақсим карда шуд.
Маркази матбуоти Хадамоти муҳоҷират
