Коррупсия ҳамчун зуҳуроти номатлуби ҷомеа таърихи қадима дошта, яке аз мушкилоти иҷтимоӣ маҳсуб меёбад, ки ба рушди устувори давлатдорӣ ва соҳаҳои мухталифи ҳаёти ҷомеа зарари манфӣ мерасонад.
Тадқиқот нишон медиҳад, ки ягон мамлакат аз хавфи коррупсия озод нест. Зуҳуроти он дар ҳар ҷо гуногун буда, дар давлатҳое, ки дар давраи гузариш аз як низоми идоракунии давлатӣ ва иқтисодӣ ба дигар низом қарор доранд, зоҳиршавии коррупсия хавфи ҷиддиеро ба раванди ислоҳоти иқтисодӣ, рушди он ва дигар паҳлӯҳои ҳаёти ҷамъиятӣ ба вуҷуд меорад.
Асосгузори сулҳу ваҳдати миллӣ–Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар мулоқоту суханрониҳояшон доир ба болоравии шиддати фасод дар ҷомеа борҳо таъкид намудаанд, ки: “Коррупсия чун як падидаи манфӣ барои пешрафти ҷомеаи мо яке аз монеаҳои хеле ҷиддӣ мебошад ва мо бояд тамоми омилҳо ва сабабҳои зуҳури коррупсияро ҳамаҷониба омӯхта, таҳлил намоем ва тамоми қувваҳои солими ҷомеаро барои пешгирии ин зуҳурот ва решакан кардани он сафарбар намоем”.
Ин аз он шаҳодат медиҳад, ҳар фарди худогоҳе, ки дар Ҷумҳурии Тоҷикистон умр ба сар мебарад, новобаста аз мавқеи мансабӣ, вазъи иҷтимоӣ, сиёсӣ ва ғайра дар мубориза бо коррупсия набояд бетараф бошад.
Ҳар шахси худогоҳу солимфикр дар кадом вазифа ва ё ҳолати корие, ки бошад, худ ва наздиконашро дар рўҳияи зиддикоррупсионӣ тарбия намояд ва ҳар амалеро анҷом диҳад, дар доираи қонун бошад, то дар мубориза бо коррупсия саҳми босазо гузорад.
Фаъолнокии ниҳодҳои зиддикоррупсионӣ меъёри асосии самаранокии амали онҳо дар самти муқовимат бо коррупсия мебошад. Маълум аст, ки дар Тоҷикистон ниҳодҳои махсусгардонидашудаи муқовимат бо коррупсия аз қабили Агентии назорати молиявӣ ва муқовимат бо коррупсия таъсис ёфтаанд, ки собиқаи зиёда аз даҳсолаи фаъолият доранд.
Ғайр аз ниҳодҳои махсусгардонидашуда дигар мақомотҳои давлатӣ, ниҳодҳои ҷомеаи шаҳрвандӣ ва созмонҳои байналхалқӣ низ дар самти муқовимат бо коррупсия фаъолият мебаранд.
Борониева Сакина,
Мутахассиси пешбари шуъбаи қабул ва маслиҳатдиҳӣ Раёсати Хадамоти муҳоҷират дар шаҳри Душанбе
