Бо мақсади гузаронидани корҳои фаҳмондадиҳӣ дар миёни шаҳрвандон – муҳоҷирони меҳнатӣ ва аъзои оилаи онҳо оид ба тағйиротҳои қонунгузории кишварҳои қабулкунанда, иқомат дар самти муҳоҷирати меҳнатӣ, пешгирии шомилшавии ҷавонон ба ҳизбу ҳаракатҳои ифротӣ, қонунгузориҳои нави Федератсияи Россия дар самти муҳоҷират, корманди бахши Хадамоти муҳоҷират дар ноҳияи Ашт Норбоев Дамир якҷоя бо сардори  шуъбаи Агентии меҳнат ва шуғли аҳолӣ Қодиров Ҷавоҳир ва Раиси ҷамоати шаҳраки Шайдон Мақсудов Ёрмат бо муҳоҷирони меҳнатии ба ватан бозгашта ва аъзои оилаи онҳо, мулоқоти судманд баргузор намуданд.

Дар рафти мулоқот ба самъи иштирокдорон расонида шуд, ки шаҳрвандоне, ки бо кӯдакони ноболиғ вориди қаламрави Федератсияи Россия мегарданд, онҳоро зарур аст, талаботҳои қонунгузории кишвари иқоматро нисбати ноболиғон риоя намоянд. Дар қаламрави Федератсияи Россия кӯдакони ноболиғ ҳамроҳ бо яке аз волидон бояд дар қайди муҳоҷиратӣ гузошта шавад. Қонунгузории кишвари Россия номнавишти муҳоҷиратии кӯдакони ноболиғро бо яке аз волидайни он иҷозат медиҳад.

Номнавишти муҳоҷиратии  ноболиғон дар асоси аризаи волидайн ё яке аз шахсони парастори кӯдаки ноболиғ дар мақомоти марбутаи муҳоҷиратии кишвари иқомат амалӣ карда мешавад. Бақайдгирӣ дар Федератсияи Россия дар асоси розигии соҳибмулк ва волидайни кӯдак сурат мегирад. Ё ин ки дар асоси пешниҳод намудани ҳуҷҷатҳои тасдиқкунандаи будубоши кӯдаки ноболиғ дар ҷойи иқомати муваққатии шаҳрванд ба қайд гирифта мешавад.

Тибқи меъёрҳои нави қонунгузории кишвари иқомат дар ҳолати надоштани қайди муваққатии шаҳрванди ноболиғи хориҷӣ ба муассисаҳои таҳсилоти ибтидоӣ ва миёна ба таҳсил фаро гирифта намешаванд.

Инчунин, ба сокинон вобаста ба хатару таҳдидҳои замони муосир, фаъолияти ташкилотҳои террористиву экстремистидошта, пешгирӣ аз ҷинояту ҷинояткорӣ, риояи ҳолатҳои санитариву гигиенӣ, хатари бемориҳои сироятӣ ва роҳҳои сироятшавии шаҳрвандон маслиҳатҳои муфид дода шуд.

Раёсати Хадамоти муҳоҷират дар вилояти Суғд