Бо ташаббуси Ташкилоти ҷамъиятии “Инсон ва Адолат” дар ҳамкорӣ бо Дафтари миллии Раёсати Комиссари Олии СММ оид ба гурезҳаҳо дар Ҷумҳурии Тоҷикистон, санаи 31 июли соли равон дар шаҳри Душанбе барои кормандони масъули дастгоҳи марказии Хадамоти муҳоҷират ва Раёсати Хадамоти муҳоҷират дар шаҳри Душанбе семинари омӯзишӣ дар мавзӯи “Масоили танзими ҳуқуқии фаъолияти меҳнатии гурезаҳо ва шахсони паноҳҷӯянда” баргузор гардид.
Дар рафти семинари омӯзишӣ намояндагони Ташкилоти ҷамъиятӣ ва Дафтари миллии Раёсати Комиссари Олии СММ оид ба гурезаҳо баромад намуда, қайд карданд, ки масъалаи ҳифзи ҳуқуқи гурезаҳо ва пешгирии гуреза шудани одамон аз солҳои аввали Истиқлоли Тоҷикистон дар маркази таваҷҷӯҳи сиёсати пешгирифтаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон мебошад. Ҷумҳурии Тоҷикистон аз миёни кишварҳои Осиёи Марказӣ нахустин шуда ба Конвенсияи соли 1951 ва Протоколи соли 1967 оид ба мақоми гурезагон ҳамроҳ шуда, ба рушди низоми миллии додани паноҳгоҳ оғоз намуд.
Қабул гардидани Қонуни Ҷумҳурии Тоҷикистон “Дар бораи афв вобаста ба қонунигардонии мақоми ҳуқуқии шаҳрвандони хориҷӣ ва шахсони бешаҳрванде, ки ба таври ғайриқонунӣ дар ҳудуди Ҷумҳурии Тоҷикистон қарор доранд” аз 18 декабри соли 2019 далели иқдоми инсондӯстонаи Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар самти ҳифзи ҳуқуқ ва озодиҳои гурезаҳо арзёбӣ мегардад.
Ҳамзамон, иброз намуданд, ки мавқеъ ва таҷрибаи Тоҷикистон ва роҳбарияти онро дар таъмини ҳуқуқи гурезагон баланд арзёбӣ намуд. Қайд гардид, ки Тоҷикистон яке аз аввалинҳо шуда, ба Конвенсияи соли 1951 ва Протоколи соли 1967 оид ба мақоми гурезагон ҳамроҳ гардид, ки ин аз ташаббусҳои инсондӯстона ва дарки амиқи ин масъала аз ҷониби Президенти Ҷумҳурии Тоҷикистон муҳтарам Эмомалӣ Раҳмон дар ҷаҳони муосир дарак медиҳад.
Дар семинари мазкур аз тарафи намояндагони болозикр баромадҳо дар мавзуъҳои: “Санадҳои ҳуқуқи байналмилалӣ ва уҳдадориҳои байналмилалии Ҷумҳурии Тоҷикистон дар соҳаи ҳуқуқи гурезаҳо”, “Низоми санадҳои меъёрӣ-ҳуқуқии Ҷумҳурии Тоҷикистон оид ба вазъи ҳуқуқии гурезаҳо”, “Шаклҳои муҳоҷирати байналмилалӣ”, “Тартиби муроҷиат оид ба гирифтани мақоми гуреза дар Ҷумҳурии Тоҷикистон ва расмиёти муайян кардани мақоми гуреза дар Ҷумҳурии Тоҷикистон”, “Қоидаҳои будубоши шахсони паноҳҷуянда ва гурезаҳо дар Ҷумҳурии Тоҷикистон”, хусусияти баррасии парвандаҳои маъмурӣ нисбати шахсони паноҳҷӯянда ва гурезаҳо барои вайрон кардани қоидаҳои будубош дар Ҷумҳурии Тоҷикистон баромадҳо шунида шуд.
Иштирокдорони семинари омӯзишӣ баргузории чунин як чорабиниро имконияти мусоид ҷиҳати такмил додани дониши назариявӣ вобаста ба ҳифзи ҳуқуқи гурезаҳо ва шахсони паноҳҷӯянда арзёбӣ намуданд.
Маркази матбуоти Хадамоти муҳоҷират
