Риояи талаботҳои амалкунандаи қонуни Федералӣ “Дар бораи будубоши қонунии шаҳрвандони хориҷӣ дар Федератсияи Россия”, тартиби ҳуҷҷатгузорӣ ва дигар хизматрасониҳои фаъолияти меҳнатии муваққатӣ дар Федератсияи Россия, доштани маълумоти зарурӣ оид ба муҳоҷирати меҳнатии бехатар, хавфҳои муҳоҷират, пешгирии муҳоҷирати ғайриқонунӣ ва худорӣ намудан аз воридшавӣ ба гурӯҳҳои тундрави ҳизбу ҳаракатҳои террористию экстремистӣ, ин буд он саволҳое, ки шаҳрвандон ба кормандони масъули шуъбаи Хадамоти муҳоҷират дар шаҳри Кӯлоб дар ҶСК “Фурудгоҳи байналмилалии Кӯлоб”пешкаш намуданд.

Вохӯриро мутахассиси пешбари шуъбаи Хадамоти муҳоҷират дар шаҳри Кӯлоб Сафаров Абдулфайз оғоз намуда, ҷамъомадагонро бо мушкилоте, ки имрӯз дар раванди муҳоҷират ба вуқуъ омадааст ва чи тавр пешгирӣ намудан аз ин омилҳо нигоҳ доштани худ суханронӣ намуда, ҳозиринро ба қонунҳои нави амлкунандаи Федератсияи Россия дар самти муҳоҷират шинос намуд.

Аз ҷумла, ба саҳми муҳоҷирон расонида шуд, ки пеш аз сафар ба кишвари Россия ҳатман аз хизматрасониҳои мутахассисони касбии Хадамоти муҳоҷирати Вазорати меҳнат, муҳоҷират ва шуғли аҳолии Ҷумҳурии Тоҷикистон истифода бурда, шиносномаи худро дар маҳзани манъшудагон санҷида, маслиҳатҳои муфид гирифта баъдан азми сафар намоянд.

Ҳамзамон, қайд гардид, ки ба тарзи дуруст пур намудани варақаи баҳисобгирии муҳоҷиратӣ аҳамияти ҷиддӣ дода, пеш аз сафар ба кишварҳои хориҷа барои фаолияти меҳнатӣ, ҳар як нафар бояд касби муайяне дошта бошад, забони давлатии қабулкунандаро ҳадди ақал бо тарзи муошират донад ва аз қонунҳои амалкунандаи давлати қарордоштаи худ хабардор буда, ҳангоми фаолияти кориаш онро риоя намуда, худро аз хавфу хатарҳои муҳоҷират дар канор гирад.

Дар ҷараёни вохӯрӣ масъалаи пешгирии шомилшавии шаҳрвандон, бахусус, муҳоҷирони меҳнатӣ ба ҳаргуна ҳизбу ҳаракатҳои тундрави террористию эктремистӣ, ҷинояту ҳуқуқвайронкунӣ, омӯзиши фарҳанги бегона ва дигар масоили мубрами рӯз фикру андешаҳо иброз гардида,  қайд карда шуд, ки экстремизм, терроризм, ифротгароӣ, миллатгароӣ бадбинии иҷтимоӣ ва мазҳабӣ дар тамоми дунё паҳн шуда, боиси халалдор намудани сохти амнияти ҷамъиятии давлатҳои осоишта ва дигар амалҳои нангини бераҳмӣ, нисбати башарият гардидааст.

Ҳар як фарди солимфикр бояд худро аз таъсири чунин гурӯҳҳо канор гирад, зеро гурӯҳу созмонҳои экстремистию террористӣ ва ифротгароён омодаанд, ки ҳар нафари ҷамъияти имрӯзаро тариқи даъватҳои таблиғотӣ истифода аз паёмакҳои телефонӣ, саҳифаҳои иҷтимоии интернетӣ, шабакаҳои интернетӣ, одноклассник, фейсбук ва дигар сомонаҳо бо ташвиқоту ваъдаҳои бардуруғ ҷалб намуда, ба сафҳои худ шомил намуда гумроҳ созанд.Бо назардошти ин таъкид гардид, ки дар мавриди дучор омадан ба чунин ҳолатҳо эҳтиёткориро аз даст надода, мушкилоти худро на ба танҳои балки ба воситаи  Сафорат, Консулгариҳо ва Намояндагии Вазорати меҳнат, муҳоҷират ва шуғли аҳолии Ҷумҳурии Тоҷикистон дар Федератсияи Россия муроҷиат намуда ҳал намоед.

Дар фарҷоми вохӯрӣ ба саволҳои сершумори ҷамъомадагон вобаста ба масъалаҳои муҳоҷират, бакортаъминшавӣ ва касбомӯзӣ ҷавобҳои қаноатбахш дода шуда, маводҳои иттилоотӣ ва брошюраҳои роҳнамоӣ  тақсим карда шуд.

Раёсати Хадамоти муҳоҷират дар вилояти Хатлон