Тибқи Нақша чорабиниҳои муштарак санаи 28-уми августи соли равон таҳти Раёсати муовини раиси ноҳияи Варзоб Ҳусейнзода Сироҷиддин Бобо, раиси Кумитаи иҷроияи Ҳизби Халқии Демократии Тоҷикистон дар ноҳияи Варзоб Қосимзода Маҳтоб Пир, намояндагии “Маркази бисёрфунксионалии муҳоҷират”-и шаҳри Москва дар Ҷумҳурии Тоҷикистон Овчаренко Маргарита ва Олимов Баҳром ва мудири бахши Хадамоти муҳоҷират дар ноҳия Олимзода Орифҷон Олим бо сокинони деҳаҳои Бакавул ва Шейхаки ҷамоати деҳоти ба номи С. Айнии ноҳияи Варзоб вохӯрӣ доир гардид.
Дар вохӯрии мазкур раис ва котиби ҷамоат, раисони кумитаҳои маҳал, имомхатибон, фаъолон, бахусус ҷавонони бекор ва волидайни муҳоҷирони меҳнатӣ иштирок намуданд.
Зимни мулоқот баромадкунандагон дар мавзуъҳои мақсад маром ва самтҳои фаъолияти намояндагии “Маркази бисёрфунксионалии муҳоҷират”-и шаҳри Москва дар Ҷумҳурии Тоҷикистон, шинос намудани корҷӯён бо шарту шароити пешниҳоднамудаи корфармоён, тартиби дуруст пур кардани анкетаҳо, оид ба будубоши муҳоҷирони меҳнатии шаҳрвандони Ҷумҳурии Тоҷикистон дар Федератсияи Россия ва дигар давлатҳои қабулкунанда, доир ба хатарҳои сироятёбӣ аз бемории вируси норасоии масунияти одам (ВНМО) дар раванди муҳоҷират, воситаҳои пешгирӣ, ташхису табобати он дар байни муҳоҷирони меҳнатӣ, фарогирии аҳолӣ бо касбомӯзӣ ва шуғли пурмасъул ва дигар масъалаҳои мубрами рӯз баромад намуданд.
Илова бар ин, баромадкунандагон қайд намуданд, ки Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Ҳукумати Ҷумҳурии Тоҷикистон дар баробари рушди соҳаҳои иқтисодию иҷтимоӣ ва фарҳанги ҷумҳурӣ, масъалаҳои муҳоҷирати меҳнатиро яке аз самтҳои афзалиятнок ва боэътимоди сиёсати иҷтимоии давлат ва Ҳукумат ҳисобида, ба ҳалли мушкилоти он пайваста таваҷҷуҳ зоҳир мекунанд.
Дар ин замина, баромадкунандагон таъкид карданд, ки тавре иттилоъ доред, Ҷумҳурии Тоҷикистон бо вуҷуди мунтазам тағйирёбии вазъи сиёсию иҷтимоӣ ва амнияти Сайёра дар роҳи пешрафти босуботи иқтисодӣ ва ба ҳадафҳои стратегӣ расидан, таъмин намудани зиндагии шоиста ва бомароми аҳолии мамлакат қадамҳои устувор гузоштааст.
Ҳамзамон ёдрас намуданд, ки тавре Пешвои муаззами миллат муҳтарам Эмомалӣ Раҳмон дар яке аз баромадҳояшон зикр намудаанд: “Саҳми муҳоҷирони меҳнатӣ дар рушди иқтисодиёти ҷаҳон назаррас буда, аз он ҳам давлати содиркунандаи қувваи корӣ ва ҳам давлати қабулкунандаи он манфиати калони иқтисодӣ ба даст меоранд”.
Инчунин, хотиррасон намуданд, ки сокинони аксари кишварҳои Сайёра ба муҳоҷирати меҳнатӣ рафта, пеш аз ҳама ба кишвари макони зисти доимӣ ва ҳам ба аҳли оилаи худ манфиат меоранд.
Ҳамчунин, иброз доштанд, ки бо мақсади ба низом даровардани равандҳои муҳоҷират, татбиқи дастуру супоришҳои Сарвари давлат ва Ҳукумати Ҷумҳурии Тоҷикистон дар сохторҳои Вазорати меҳнат, муҳоҷират ва шуғли аҳолии Ҷумҳурии Тоҷикистон, Хадамоти муҳоҷират ва зерсохторҳои он дар вилоятҳо, шаҳрҳо ва ноҳияҳои ҷумҳурӣ таъсис дода шуданд, ки ҳадафи он ба ташвиқу тарғиби қонунҳои амалкунандаи Ҷумҳурии Тоҷикистон ва кишварҳои қабулкунанда, инчунин ҳалли мушкилоти муҳоҷирони меҳнатӣ ва омодагии пеш аз сафари онҳо иртибот доранд.
Зимни вохӯрӣ баромадкунандагон ибрози андеша намуданд, ки читавре, ки маълум аст, Федератсияи Россия дар қонунгузории худ нисбати муҳоҷирони меҳнатии воридшаванда дигаргуниҳо ворид намуда, низоми дохил шудан ба кишварашро пурзӯр намудааст, мавриди амал қарор дорад. Ба муҳоҷирони меҳнатӣ акнун лозим мебояд, ки қоидаҳои навъи будубошро дар Федератсияи Россия риоя намоянд.
Дар фарҷоми вохӯрӣ аз тарафи бахши Хадамоти муҳоҷират ба иштирокчиён варақаҳои таблиғотӣ дар мавзуъҳои гуногун дастрас гардонида шуд.
Бахши Хадамоти муҳоҷират дар ноҳияи Варзоб
