Дар асоси нақша-чорабиниҳои Мақомоти иҷроияи ҳокимияти давлатии ноҳияи Қубодиён вобаста ба тақвияти корҳои идеологӣ, тарғиботу фаҳмондадиҳӣ дар деҳаи Арабхонаи ҷамоати деҳоти Носири Хусрав бо фаъолон, муҳоҷирони ба ватан бозгашта ва волидайни муҳоҷирон вохӯрии судманд баргузор гардид.

Зимни мулоқот масъалаҳои мубрами рӯз, аз ҷумла пешгирии шомилшавии ҷавонон ба ҳизбу ҳаракатҳои ифротӣ, мубориза бо тақлид ба фарҳанги ба мо бегона, риояи талаботи Қонуни Ҷумҳурии Тоҷикистон “Дар бораи танзими ҷашну маросим дар Ҷумҳурии Тоҷикистон”, самаранок истифода бурдани қитъаҳои замини наздиҳавлигӣ, сарфакорона истифода бурдани нерӯи барқ, инчунин фаҳмонидани муҳтавои суханронии Пешвои миллат муҳтарам Эмомалӣ Раҳмон дар Маҷлиси васеи Кумитаи Марказии ҲХДТ аз 17 июли соли 2025 мавриди баррасӣ қарор гирифтанд.

Суханварон таъкид карданд, ки танҳо бо якдилӣ, ҳамкорӣ ва риояи қонунгузории амалкунанда метавон ба ҷомеаи солиму пешрафта ноил шуд. Таъкиди муҳими дигар ба масъулияти ҷавонон дар таъмини амният ва суботи дохилӣ равона шуда, аз аҳли ҷомеа даъват ба амал оварда шуд, ки дар самти тақвияти ҳисси ватандӯстӣ, зиракии сиёсӣ ва арҷгузорӣ ба арзишҳои миллӣ бештар саҳмгузор бошанд.

Ҳар яки  мо бояд дар таълиму тарбияи фарзандон саҳми беназири худро гузорем, чун фарзанди нек ояндаи некро барои худ месозад. Бояд гуфт ки имруз занони мо ба либоси бегона бисёр таваҷҷуҳ равона кардаанд, ин тақлидкорӣ хоси мардуми тоҷик нест. Мардуми тоҷик фарҳанги ғание дорад. Зарур аст ки бештар ба либоси миллӣ ру оварему барои фарзандони худ низ ин равандро омӯзонем.Дар баргузории маъракаҳо низ бояд меъёрро риоя намоем, чун ин ба  фоидаи буҷети оилаи мо мебошад.

Ҳамзамон, дар рафти вохӯрӣ мудири бахши Хадамоти муҳоҷират дар ноҳия маъруза намуда, вобаста ба тағйиротҳо дар қонунгузории муҳоҷиратии Федератсияи Россия маълумот дод.

Аз ҷумла, ба таваҷҷуҳи иштирокчиён расонида шуд, ки  дар қонунгузории Федератсияи Россия парвариш, нигоҳдоштан, истифода ва  интиқол додани растании ҳазориспанд, ҳамчун қонуншиканӣ дар шакли ҳуқуқвайронкунии маъмурӣ ва ҷиноят пешбинӣ шудааст.

Гуфта шуд, ки мардуми кишвари мо бо назардошти таҷрибаи ҳазорсолаи гузаштагони худ, ки ҳатто дар тибби ғайриилмии шарқ истифода мешуд, аз гиёҳи ҳазориспанд ҳамчун даво барои пешгирӣ ва рафъи чандин навъи беморӣ, алалхусус аз  оташ ва дуди он барои рафъи зуком истифода мекард. Албатта таҷрибаи мардуми мо дар мавриди истифодаи ин растанӣ асос ва ё дастоварди дар шакли озмоишӣ ташхисшудаи илмӣ надошт ва чандон маъмул ва машҳур ҳам набуд.

Бояд қайд намуд, ки акнун мақомоти масъули ФР дар натиҷаи ташхисҳои илмии  лабараторӣ муайян карданд, ки дар таркиби растании “Ҳазориспанд” элементҳои дахлдор маводҳои нашъадор ва психотропӣ мавҷуд буда, истифодаи он метавонад, ки ба ҳаёт ва саломатии инсон хатарнок бошад. Бинобар ин, истифодаи ғайриқонунии онро қонуншиканӣ эътироф кардаанд.

Бадбахтона дар якчанд моҳи охир чандин нафар шаҳрвандони Ҷумҳурии Тоҷикистон дар ФР бо сабаби бо худ доштани растании “Ҳазориспанд” дастгир шуда, ба ҷавобгарии ҷиноятӣ кашид шуда, ба ҳабс гирифта шудаанд.

Бинобар ин, аз сокинони ноҳия хоҳиш карда шуд, ки минбаъд аз истифодаи ин растанӣ худдорӣ карда, қатъиян намунае аз ин растанӣ берун аз Ҷумҳурии Тоҷикистон бо худ набаранд.

Ҳамзамон ҳамватанон водор карда мешаванд, ки пайвандону наздикони худро, ки дар муҳоҷират қарор доранд, аз ин масъала огоҳ кунанд.

Дар охир иштирокдорон аз баргузории чунин вохуриҳо изҳори сипос намуданд.

Раёсати Хадамоти муҳоҷират дар вилояти Хатлон