Бо мақсади фароҳам овардани шароити мусоид ба шаҳрвандони бекор ҷиҳати интихоби ҷойи кории мувофиқ, ба кордиҳандагон барои интихоби мутахассисон мавриди талабот, муътадил гардонидани вазъи бозори меҳнат дар шаҳри Душанбе, 29 августи соли равон, дар кӯчаи Неъмат Қарабоеви ноҳияи Фирдавсии пойтахт ярмаркаи навбатии ҷойҳои нави корӣ, вазифаҳои озод ва корҳои фаҳмондадиҳӣ гузаронида шуд.

Дар ярмаркаи мазкур кормандони дастгоҳи марказии Хадамоти муҳоҷират, МД “Марказҳои машваратӣ ва омодагӣ пеш аз сафари муҳоҷирони меҳнатӣ” дар шаҳри Душанбе, ҷиҳати бурдани корҳои фаҳмондадиҳӣ бо шаҳрвандон, инчунин шуъбаҳои Агентии меҳнат ва шуғли аҳолии ноҳияҳои шаҳри Душанбе, МД “Маркази ҷумҳуриявии роҳнамоии касбӣ”, муассисаҳои таълимии низоми Агентӣ, МД “Агентии бокортаъминкунӣ дар хориҷа иштирок доштанд.

Ҳамзамон, аз ҷониби намояндагони 30 корхона, муассисаю ташкилотҳои пойтахт иштирок карда, дар маҷмуъ, 4381 ҷойҳои кории холӣ дар дохил ва хориҷи кишвар ба шаҳрвандони корҷӯ пешниҳод гардид.

Инчунин, дар рафти ярмарка аз ҷониби кормандони масъули Хадамоти муҳоҷират ва зертобеи он корҳои фаҳмондадиҳӣ оид ба муҳоҷирати бехатар дар давлати қабулкунанда, қонунҳои нави кишвари Россия дар самти муҳоҷирати меҳнатӣ, пешгирии шомилшавии ҷавонон ба ҳизбу ҳаракатҳои ифротӣ, экстремизму терроризм, пешгирии савдои одамон, бемориҳои сироятӣ (ВНМО) ва дигар масъалаҳои мубрами рӯз суханронӣ карда шуд.

Қайд гардид, ки айни замон дар дохили кишвар ҷойҳои кории холӣ  бо музди меҳнати арзанда ва шароиту имконияти хуб дар ширкатҳои сохтмонӣ, саноатӣ, роҳсозӣ ва дигар корхонаҳои бузурги ватанӣ фароҳам буда, қувваи корӣ ва мутахассисони соҳибмалака бемамоният ба кор қабул карда мешаванд.

Дар ҷараёни ярмарка аз тарафи кормандони Хадамоти муҳоҷират ба шаҳрвандон варақаҳои иттилоотӣ, брошюраҳо ва раҳнамои Хадамот тақсим карда шуд.

Маркази матбуоти Хадамоти муҳоҷират