Терроризм яке аз зуҳуроти номатлуби ҷиддии ҷаҳони муосир ба шумор меравад, ки ба амнияти ҷомеа, суботи сиёсӣ ва зиндагии осоиштаи мардум таҳдид менамояд. Дар Тоҷикистон, ки кишвари сулҳпарвар ва босубот аст, мубориза бо терроризм ва пешгирии он аз самтҳои муҳими сиёсати давлатӣ мебошад. Мубориза бо терроризм барои таъмини амнияти миллӣ, ҳифзи ҳуқуқи инсон ва пешбурди сулҳу субот дар ҷомеа аҳамияти калон дорад.

Ин мубориза натанҳо ба пешгирии амалҳои террористӣ, балки ба решакан кардани сабабҳои он низ нигаронида шудааст. Мо ба наврасону ҷавонон фаҳмонем, ки бояд муттаҳид, якдил ва дастаҷамъ бошем, ба иғвои хоинон дода нашавем, кӯшиш ба харҷ диҳем, то ки Ватани худро аз дасисаҳои душманон эмин нигаҳ дорем.

Сулҳеро, ки нодиртарин ва қиматтарин неъмат мебошад, ба мо зарур аст, ки чун гавҳараки чашм ҳифз кунем ва ҳама аз як гиребон сар бароварда, барои ҳимояи манфиатҳои миллӣ камар бубандем, дар муқовимат бо афкори экстремистӣ, террористӣ муташаккилона мубориза барем ва нагузорем, ки нохалафе фазои ороми Тоҷикистони азизамонро нотинҷ созад.

Ҳар як шаҳрванд метавонад дар мубориза бо терроризм саҳм гузорад. Огоҳии иҷтимоӣ, гузориш додан дар бораи фаъолиятҳои шубҳанок ва дастгирии сиёсати давлатӣ дар ин самт метавонад ба таҳкими амният мусоидат кунад. Инчунин, оила ва муассисаҳои таълимӣ дар тарбияи насли огоҳ ва сулҳпарвар нақши муҳим доранд.

Мубориза бо терроризм як вазифаи мураккаб, вале муҳим аст, ки ҳамкории давлат, ҷомеа ва созмонҳои байналмилалиро талаб мекунад. Тоҷикистон бо таҷрибаи ғании худ дар таъмини сулҳу ваҳдат метавонад намунаи муваффақи мубориза бо ин таҳдид бошад. Бо истифода аз тадбирҳои пешгирикунанда ва баланд бардоштани сатҳи огоҳии мардум, мо метавонем ҷомеаи бехатар ва устувор бунёд кунем.

Авазов М,

Корманди масъули Раёсати Хадамоти муҳоҷират дар шаҳри Душанбе