Бо мақсади иҷрои дастуру супоришҳои Асосгузори сулҳу ваҳдати – миллӣ, Пешвои миллат муҳтарам Эмомалӣ Раҳмон ва тибқи нақшаи муштараки сохторҳои дахлдори шаҳри Хуҷанд мулоқоти масъулин бо сокинони маҳаллаи “Ваҳдат”-и шаҳр доир ба масоили доғи ҷомеа баргузор гардид.
Зимни вохурӣ масъулин аз сокинони маҳалла ҷиҳати саҳми назаррас гузоштан дар татбиқи сиёсати пешгирифтаи Президенти Ҷумҳурии Тоҷикистон, Пешвои миллат, муҳтарам Эмомалӣ Раҳмон нисбати баланд бардоштани ҳисси худшиносиву худогоҳӣ, ватандориву меҳанпарастӣ ва маънавиёти ҷомеа, андешидани тадбирҳо баҳри беҳтар намудани вазъи иқтисодиву иҷтимоии шаҳр, ободу зебо гардидани маҳаллаи худ ва ҷалби аҳолӣ ба корҳои созандагиву бунёдкорӣ, мусоидат намудан ба рушди соҳаи маориф, дастгирии моддиву маънавии муассисаҳои таълимии ҳудуди шаҳр, андешидани тадбирҳо барои бартараф намудани ҳама гуна шаклҳои зӯроварӣ дар оила, ташаккули муҳити солими оилавӣ, мусоидат ба риояи ҳуқуқ ва манфиатҳои ҳар як аъзои оила ва ташаккули шахсиятҳои комил ва ғайра даъват ба амал оварда шуд.
Дар рафти вохӯрӣ вобаста ба баланд бардоштани сатҳи маърифати аҳолӣ, аз ҷумла муҳоҷирони меҳнатие, ки ба Ватан бозгаштанд, доир ба эҳсоси амиқи ватандӯстӣ ва масъулиятшиносӣ ба давлату Ватан, ҳимояи он аз таҳдиди хатарҳои муосир, мубориза бар зидди ҷиноятҳои хусусияти коррупсионидошта, гаравиши ҷавонон ва муҳоҷирони меҳнатӣ ба гурӯҳҳои ифротгароӣ, террористиву экстремистӣ, ҷиноӣ, нашъаҷаллобӣ иттилоъ дода шуда, даъват гардид, ки аз ҳар гуна гурӯҳҳои мухолифатангез дурӣ ҷуста, аз бемориҳои сироятшаванда худ ва аъзои оилаи худро эмин нигоҳ доранд.
Гуфта шуд, ки шурӯъ аз 1 сентябри соли 2025 қоидаи нав ҷорӣ гардид. Шаҳрванди хориҷие, ки бо мақсади “Кор” ба шаҳри Москва ё вилояти Москва ворид мешавад, вазифадор ҳаст, ки Вазорати корҳои дохилиро (ВКД ФР) тариқи Барномаи мобилии “Амина” дар бораи ҷои аслии зисти худ огоҳ намояд.
Барои огоҳ намудани Вазорати корҳои дохилӣ бояд:
- Корти шаҳрванди хориҷиро дошта бошед (Корти сурх).
- Барномаи мобилии “АМИНА”-ро ба телефони мобилиатон борсозӣ намоед ва ба тариқи QR-коди корти шаҳрванди хориҷӣ ба Барномаи мобилӣ ворид шавад.
- Маълумоти шахсии худро нишон диҳед, акс ва нусхаи шиносномаро бор кунед
- Суроғаи аслии зисти худро ворид намоед
- Дар ҳолати иваз шудани суроға, маълумотро дар давоми 3 рӯз дар Барнома навсозӣ намоед.
Дар охир, сокинон суолҳои худро матраҳ намуда, посухҳои муфассал ва муътамад дарёфт карданд. Чунин чорабиниҳо дар истгоҳи “Роҳи Абрешими шаҳри Хуҷанд” ва маркази шаҳр бо шаҳрвандон ва аъзои оилаи муҳоҷирони меҳнатӣ баргузор карда шуд.
Раёсати Хадамоти муҳоҷират дар вилояти Суғд
