Дар доираи татбиқи ташаббусҳои Ҳукумати Ҷумҳурии Тоҷикистон ҷиҳати тақвияти робита бо аҳолии маҳаллӣ ва баланд бардоштани сатҳи огоҳии шаҳрвандон аз масъалаҳои муҳими иҷтимоӣ ва ҳуқуқӣ, дар деҳаи Доққии ҷамоати деҳоти Вобканди ноҳияи Қубодиён вохӯрии навбатӣ бо сокинон баргузор шуд. Дар он аъзои гурӯҳи кории мақомоти иҷроияи ҳокимияти давлатии ноҳия иштирок ва суханронӣ намуданд.
Дар вохӯрӣ масъулин талаботи қонунҳои Ҷумҳурии Тоҷикистон “Дар бораи танзими ҷашну маросимҳо дар Ҷумҳурии Тоҷикистон”, “Дар бораи масъулият барои таълиму тарбияи кӯдак” ва “Дар бораи тарбияи ватандӯстии шаҳрвандон”-ро шарҳ дода, ба масъалаҳои муҳим, аз ҷумла фаро гирифтан ба шуғл ва касбу кор барои ҷавонони бекор ва занони хонашин, пешгирии шомилшавӣ ба ҳизбу ҳаракатҳои экстремистиву террористӣ, мубориза бо хурофотпарастӣ ва бегонапарастӣ, муҳоҷирати бехатар, қонунҳои нави кишвари Россия дар самти муҳоҷират ва дигар масъалаҳои мубрами рӯз ибрози андеша намуданд.
Аз ҷумла, зикр доштанд, ки баланд бардоштани маърифати ҳуқуқӣ ва шуури сиёсӣ, беҳтар намудани сифати таълим ва тарбия дар мактабҳо, ҷалби наврасону ҷавонон ба тарзи ҳаёти солим ва тарбияи онҳо дар руҳияи ватандӯстию меҳанпарастӣ, аз тадбирҳои муҳим барои пешрафти ҳаёти иҷтимоии ҷомеа мебошанд.
Дар рафти вохӯрӣ намояндаи Хадамоти муҳоҷират дар ноҳия ба самъи сокинон расонид, ки донистану риоя кардани қонуну қоидаҳои кишварҳои бакорқабулкунанда вазифаи ҳар як шаҳрванд ва хоса муҳоҷирони меҳнатӣ ба ҳисоб рафта, надонистан ва ё саркашӣ кардан аз он ба ҷавобгарии ҷиноятӣ оварда мерасонад.
Бояд зикр кард, ки имрӯзҳо дар қаламрави Федератсияи Россия 19 намуди растанӣ таҳти назорати давлатӣ қарор дошта, барои парваришу нигоҳдории ин растаниҳо тибқи моддаи 231-и Кодекси ҷиноятии Федератсияи Россия ҷавобгарӣ муқаррар шудааст.
Яке аз чунин растаниҳо ин “Ҳазориспанд” ё “Гармала” мебошад, ки алкалоидҳо ба монанди гармалину гармин ва хусусияти психоактивӣ дорад. Ин растанӣ барои ворид, муомилот ва истеъмол дар ҳудуди Россия қатъиян манъ шудааст.
Бинобар ин, аз ҳар як шаҳрванди Ҷумҳурии Тоҷикистон даъват ба амал меорем, ки ҳангоми сафар ба Федератсияи Россия аз бурдани ҳазориспанд худдорӣ намоянд ва ба хотири чанд миқдор маблаѓ ҳаёти худу оилаи худро зери хатар нагузоранд.
Дар поёни вохӯрӣ таъкид гардид, ки ҳар як сокини кишвар бояд худро дар назди ободиву пешрафти Ватан масъул дониста, дар чорабиниҳои сиёсӣ ва ҷамъиятӣ фаъолона ширкат варзад.
Раёсати Хадамоти муҳоҷират дар вилояти Хатлон
