Гурӯҳи кории Хадамоти муҳоҷират дар шаҳри Ҳисор ва ноҳияи Рӯдакӣ якҷоя бо сохторҳои мақомоти иҷроияи ҳокимияти давлатӣ вохӯрии судманд бо сокинон, фаъолон ва муҳоҷирони ба ватан бозгашта баргузор намуданд.

Зимни вохӯрӣ масъулин дар бораи тағйиру иловаҳо ба қонунгузории нави Федератсияи Россия дар самти муҳоҷират, гирифтани сертификат, патент, полиси тиббӣ-суғуртавӣ, бастани шартнома бо корфармо, ҳолати будубош дар кишвари қабулкунанда, аз ҷумла дар бораи он нафароне, ки вурудашон ба кишвари Россия манъ аст, суханронӣ намуданд. Таъкид шуд, ки сокинони мамлакат пеш аз сафар ҳатман ба раёсату, шуъбаву бахшҳои Хадамоти муҳоҷират дар шаҳру ноҳияҳои ҷумҳурӣ муроҷиат намоянд.

Дар навбати худ сокинони шаҳри Ҳисор ва ноҳияи Рӯдакӣ, ки пайвандони онҳо дар  муҳоҷирати меҳнатӣ қарор доранд, аз масъалаҳои мубрами рӯз ва проблемаҳои муҳоҷирати корӣ пурсон шуда, ба саволҳои додашуда ҷавобҳои мушаххас гирифтанд. Ҳар як сокини кишвар хотирасон карда шуд, ки пеш аз сафар ба давлати Россия ҳатман забони русӣ, таърих ва қонунгузории давлати қабулкунандаро донанд ва соҳиби касбу ҳунари коргарӣ буданашон низ шарт аст.

Ҳамзамон, иброз гардид, ки имрӯзҳо гурӯҳҳои ғайриқонунии террористӣ фаъолияти хешро паҳн намуда истодаанд ва мақсади асосии онҳо ин ноором намудани вазъ бо истифода аз ғояҳои экстремистӣ ва ҷалби бештари пайравон дар сартосари ҷаҳон мебошад.

Аз ин рӯ, мо бояд ҳушёриву зиракии сиёсиро аз даст надода, фирефтаи гумроҳи чунин ниятҳои нопоки ҳизбу ҳаракатҳои тундрав нагардида, ҷавононро ҳушдор созем, то ба онҳо шомил нагарданд.

Масъулин ба ҷамъомадагон гуфтанд, ки марказҳои машваратии Хадамоти муҳоҷират омодааст, шаҳрвандони мамлакатро, ки соҳибкасб мебошанд, бо ҷойи кор берун аз ҷумҳурӣ, аз ҷумла дар ширкатҳои Федератсияи Россия ва дигар давлатҳои хориҷ бо кор таъмин намоянд.

Чунин вохӯриҳои саривақтӣ аз ҷониби гурӯҳи кории Хадамоти муҳоҷират дар шаҳру ноҳияҳои тобеи ҷумҳурӣ идома дорад.

Маркази матбуоти Хадамоти муҳоҷират