17 октябри соли 2025 дар Хадамоти муҳоҷират вохӯрии корӣ бо роҳбарону намояндагони ширкатҳои интиқолдиҳандаи шаҳрвандон ба хориҷи кишвар баргузор гардид.

Дар ҷараёни вохӯрӣ натиҷаҳои фаъолияти нуҳ моҳи соли 2025 мавриди таҳлил ва баррасӣ қарор гирифт. Зимни мулоқот роҳбарияти Хадамот иттилоъ дод, ки дар ин давра бо мусоидати ширкатҳои расмии интиқолдиҳанда шаҳрвандони ҷумҳурӣ ба кори муназзами хориҷ аз кишвар сафарбар карда шудаанд.

Масъалаҳои марбут ба таъмини ҳифзи ҳуқуқҳои муҳоҷирон, беҳтар намудани сифати хизматрасонӣ, пешгирии ҳолатҳои фиребу қаллобӣ ва баланд бардоштани сатҳи огоҳии ҳуқуқии шаҳрвандон низ мавриди таваҷҷуҳ қарор гирифтанд.

Роҳбарони ширкатҳо пешниҳоду мулоҳизаҳои худро дар самти такмили ҳамкорӣ, бартарафсозии мушкилоти мавҷуда ва тақвияти механизми ҳамоҳангсозӣ бо сохторҳои давлатӣ иброз доштанд.

Ҳамзамон, аз ҷониби иштирокдорон тавсия дода шуд, ки Ассотсиатсияи ширкатҳои интиқолдиҳандаи шаҳрвандон ба хориҷи кишвар дар Ҷумҳурии Тоҷикистон таъсис дода шавад. Ин имкон медиҳад, масъулиятнокӣ тарафайн боз ҳам мустаҳкам гардида, сатҳу сифати муҳоҷирати меҳнатиро боло бурда, ҳифзи манфиатҳои шаҳрвандонро дар хориҷ таъмин мегардад.

Маркази матбуоти Хадамоти муҳоҷират