Гурӯҳи кории Мақомоти иҷроияи ҳокимияти давлатии ноҳияи Файзобод дар ҳамбастагӣ бо сохторҳои дахлдори ноҳия бо сокинони ҷамоатҳои деҳоти Баҳор ва Меҳробод вохӯрии судманд анҷом доданд.
Маврид ба зикр аст, ки ташкили вохӯрии мазкур бо мақсади пешгирии омилҳои номатлуб миёни наврасону ҷавонон, ҷинояткорӣ, пешгирӣ онҳо аз шомилшави ба экстремизму терроризм, ҷалби падару модар ба таълиму тарбияи фарзанд, фаҳмонидани муҳтавои қонунҳои Ҷумҳурии Тоҷикистон “Дар бораи масъулият барои таълиму тарбияи кӯдак”, “Дар бораи маориф”, “Дар бораи тарбияи ватандӯстии шаҳрвандон”, пешгирии ҷудошавии оилаҳои ҷавон, эҳтироми фарҳанги миллӣ, муҳоҷирати бехатар, пешгирии бегонапарастӣ, ба роҳ мондани корҳои тозагиву ободонӣ ва риояи маданияти шаҳрнишинӣ корҳои фаҳмондадиҳӣ ба роҳ монда шуданд.
Ҳамзамон, гурӯҳи тарғиботӣ таваҷҷуҳи иштирокдоронро ба масъалаҳои омодагӣ ва ҷалби ҷавонони синни даъватӣ ба хизмати ҳарбӣ, вусъати корҳои ободонию созандагӣ ба ифтихори 35-солагии Истиқлоли давлатӣ ва иҷрои талаботи қонунҳои амалкунандаи кишвар, аз ҷумла: қонуни Ҷумҳурии Тоҷикистон “Дар бораи танзим ҷашну маросим дар Ҷумҳурии Тоҷикистон” ҷалб намуданд.
Намояндаи Хадамоти муҳоҷират дар ноҳия ба самъи сокинон расонид, ки донистану риоя кардани қонуну қоидаи кишварҳои бакорқабулкунанда вазифаи ҳар як шаҳрванд ва хоса муҳоҷирони меҳнатӣ ба ҳисоб рафта, надонистан ва ё саркашӣ кардан аз он ба ҷавобгарии ҷиноятӣ оварда мерасонад.
Бояд зикр кард, ки имрӯзҳо дар қаламрави Федератсияи Россия 19 намуди растанӣ таҳти назорати давлатӣ қарор дошта, барои парваришу нигоҳдории ин растаниҳо тибқи Кодекси ҷиноятии Федератсияи Россия ҷавобгарӣ муқаррар шудааст.
Яке аз чунин растаниҳо ин “Ҳазориспанд” ё “Гармала” мебошад, ки алкалоидҳо ба монанди гармалину гармин ва хусусияти психоактивӣ дорад. Ин растанӣ барои ворид, муомилот ва истеъмол дар ҳудуди Россия қатъиян манъ шудааст.
Бинобар ин, аз ҳар як шаҳрванди Ҷумҳурии Тоҷикистон даъват ба амал меорем, ки ҳангоми сафар ба Федератсияи Россия аз бурдани ҳазориспанд худдорӣ намоянд ва ба хотири чанд миқдор маблағ ҳаёти худу оилаи худро зери хатар нагузоранд. Дар фарҷоми вохӯрӣ сокинон саволҳои хешро матраҳ намуданд ва намояндагони гурӯҳи корӣ ба онҳо посухҳои муфассал доданд.
Бахши Хадамоти муҳоҷират дар ноҳияи Файзобод
