Бо ташаббуси бахши Хадамоти муҳоҷират дар ноҳияи Қубодиён дар деҳаи ба номи Х. Файзуллоеви Ҷамоати деҳоти Тахти Сангин якҷо бо гурӯҳи кории Мақомоти иҷроияи ҳокимияти давлатии ноҳия вохӯрии судмандро бо омӯзгорони Муассисаи таҳсилоти миёнаи умумии №30-и ноҳия баргузор намуданд.
Дар мулоқот баромадкунандагон оид ба муҳтавои Паёми Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон, Раиси муаззами Ҳизби Халқии Демократии Тоҷикистон муҳтарам Эмомалӣ Раҳмон ба Маҷлиси Олӣ ва дар Маҷлиси васеи Кумитаи Иҷроияи Марказии Ҳизби Халқии Демократии Тоҷикистон дуруст ва самаранок истифода бурдани қувваи барқ, риояи талаботи Қонуни Ҷумҳурии Тоҷикистон “Дар бораи энергетика”, самаранок истифода намудани заминҳои наздиҳавлигӣ, вазъи мураккаби ҷаҳони муосир, муҳоҷирати бехатар, саҳмгузорӣ дар корҳои ободониву созандагӣ, сарсабзу хуррамгардонии ҳар гӯшаи диёр, ҷалби ҷавонон ба сафи Қувваҳои Мусаллаҳи Ҷумҳурии Тоҷикистон, риояи қонунҳои Ҷумҳурии Тоҷикистон “Дар бораи танзими ҷашну маросимҳо дар Ҷумҳурии Тоҷикистон” ва “Дар бораи масъулият дар таълиму тарбияи кӯдак”, пешгирии шомилшавии ҷавонон ба гурӯҳҳои террористӣ ва экстремистӣ, истифодаи дурусти телефонҳои мобилӣ, пешгирии зӯроварӣ дар оила, касбомӯзиву забономӯзӣ ва дигар масъалаҳои мубрами рӯз суханронӣ намуданд.
Намояндаи бахши Хадамоти муҳоҷират дар ноҳия оид ба қоидаҳои будубош дар ҳудуди Федератсияи Россия, тартиби бастани шартномаҳои меҳнатӣ ва риояи меъёрҳои ҳифзи меҳнат мавриди баррасӣ қарор гирифтанд.
Ҳамзамон, ҳозирин иттилоъ дар бораи хатарҳое гирифтанд, ки бо ҷалби муҳоҷирон ба гурӯҳҳои радикалӣ, террористӣ ва ҷинояткор вобастаанд. Иштирокчиён ба ҳушёрӣ, дурӣ аз ҳар гуна сохторҳои вайронкор ва аҳамияти ҷиддӣ додан ба таҳсил ва ҷалби фарзандон ба раванди таълим даъват гардиданд.
Таъкид карда шуд, ки риояи меъёрҳои санитарӣ ва қоидаҳо, инчунин андешидани чораҳои муҳофизат аз бемориҳои сироятӣ, аз ҷумла ВНМО (ВИЧ) зарур аст.
Илова бар ин, тавсия дода шуд, ки аз гузаронидани маблағ аз кортҳои бонкии худ ба дархости шахсони бегона худдорӣ намоянд, зеро чунин амал метавонад ба маблағгузории гурӯҳҳои террористӣ ва экстремистӣ мусоидат кунад ва барои онҳо ҷавобгарии қонунӣ ба миён оварад.
Дар фарҷоми вохӯрӣ омӯзгорон ба саволҳои худ посухҳои мушаххас гирифтанд.
Маркази матуботи Хадамоти муҳоҷират
