Кормандони шуъбаи Хадамоти муҳоҷират дар шаҳри Кӯлоб ҳамарӯза ба садҳо нафар сокинони шаҳру ноҳияҳои вилояти Хатлон, ки тавассути ҳавопаймо ба минтақаҳои гуногуни Федератсияи Россия сафар доранд, вохӯриву мулоқотҳо намуда, оид ба вазъи муҳоҷират ва қонунгузории нави ин кишвар дар самти муҳоҷирати меҳнати маслиҳатҳои муфид медиҳанд. Тавре мутахассиси пешбари шуъбаи Хадамоти муҳоҷират Абдулфайз Сафаров иброз дошт, қариб ҳаррӯз тавассути “Фурудгоҳи байналмилалии Кӯлоб” садҳо нафар ҷавонони сину соли гуногун барои фаъолияти меҳнатӣ ба кишвари қабулкунанда Федератсияи Россия равонаанд, суҳбатҳо гузаронида, оид ба қонунгузории нави кишвари Россия дар самти муҳоҷирати меҳнати, аз ҷумла тарзи гирифтани патент, омода намудани ҳуҷҷатҳо ва дигар масъалаҳои муҳоҷират пурсон мешаванд, маслиҳатҳои ҳуқуқӣ дода мешавад.
Аз ҷумла, он шаҳрвандоне, ки ҳамчун муҳоҷири меҳнати ба Федератсияи Россия сафар менамоянд, ба талаботҳои бозори ҷаҳони, сатҳи забондони ва малакаи касбии онҳо мутобиқат намекунанд ва онҳоро зарур меояд, ки сатҳи забондони ва малакаи касбияшонро дар сатҳи талаботи бозори ҷаҳони баланд бардошта, баъд азми сафар намоянд. Абдулфайз Сафаров қайд намуд, ки имрӯзҳо аксарияти шаҳрвандони мо орзӯи ба Федератсияи Россия барои пайдо намудани кори мувофиқ талош менамоянд, аммо онҳо андеша намекунанд, ки дар ин кишвар рӯз то рӯз кору фаъолият намудан дучанд мушкил гардидааст.
Бояд таъкид намуд, ки имрӯз бозори ҷаҳони танҳо ба муҳоҷирони касбу ҳунар дошта эҳтиёҷ дорад. Вақти он расидааст, ки ҳар як фарди муҳоҷир, ки ба хориҷи кишвар сафар мекунад, инро дарк намояд ва падару модари онҳо бетарафи зоҳир накунанд. Айни замон дар минтақаҳои гуногуни Федератсияи Россия пеш аз ҳама ҳамон шахсонеро қабул менамоянд, ки касбу ҳунар доранд. Шахсоне, ки ягон касб надоранд, сарсону саргардон аз шашмоҳ то як сол бекоргашта, аъзои оилаи худро баташвиш мегузоранд.
Аз ин лиҳоз, кормандони шуъбаи Хадамоти муҳоҷират дар шаҳри Кӯлоб иттилло медиҳанд, ки ҳар як фарди тоҷике, ки ба муҳоҷирати меҳнати меравад, пеш аз сафар ҳатман ба раёсати Хадамоти муҳоҷират ва шуъбаву бахшҳои он дар шаҳру ноҳияҳои вилояти Хатлон муроҷиат намоянд. Дар сафар дар даст аз брошюраҳои омода кардаи Хадамоти муҳоҷират дар бораи қонунгузории нави Федератсияи Россия ва дигар масъалаҳои мубрами рӯз дошта бошанд. Шаҳрвандони ҷумҳурӣ бояд аз ташхиси тибби гузашта бо корфармо шартномаи меҳнати баста, сертификати донистани забони русӣ, таърих ва асосҳои қонунгузории ин кишварро дошта бошанд, патент гиранду оромона кору фаъолият намоянд. Ҳамзамон, ба диққати шаҳрвандон расониданием, ки шахсоне, ки аз Ҷумҳурии Тоҷикистон ба Федератсияи Россия сафар мекунанд, ҳангоми убури сарҳади ин кишвар, ба сарҳадчиён маълумоти равшан пешниҳод намоянд ва ба саволҳои онҳо ҷавоб диҳанд:
1. Барои чӣ ва чаро ба Федератсияи Россия парвоз кардед (кор?, табобат?, меҳмонӣ?)
2. Дар куҷо истиқомат мекунед дар ФР, суроға?
3. Ҷои тасдиқи аниқ дошта бошед, дар ҷойи кор ё суроғаи дигаре, ки ба куҷо меравед, шуморо ки интизор аст?
Ҳама ҳуҷҷатҳо ва мусофирон бояд дуруст бошанд ва мувофиқи он аломатгузорӣ карда шаванд. Мусофирон бояд ба таври возеҳ ва дилпурона суҳбатро бо кормандони сарҳадчиёни рус гузаронанд ва маълумоти боэътимодро пешниҳод кунанд.
Суҳбат бо забони русӣ амалӣ мегардад.
Маркази матбуоти Хадамоти муҳоҷират
