Санаи 23 декабри соли 2025 дар синфхонаи Муассисаи давлатии «Марказҳои машваратӣ ва омодагии пеш аз сафари муҳоҷирони меҳнатӣ» дар шаҳри Душанбе озмуни ҷойҳои холии корӣ дар ширкатҳои Давлати Қатар дар шакли видеоконфронс баргузор гардид. Дар озмун 80 нафар довталаб иштирок намуд.
Ҳадафи баргузории ин озмун фароҳам овардани имкониятҳои қонунии шуғли шаҳрвандони Ҷумҳурии Тоҷикистон дар хориҷи кишвар, баланд бардоштани сатҳи огоҳии довталабон ва интихоб намудани кадрҳои мувофиқ барои бозори меҳнати Давлати Қатар мебошад.
Дар ҷараёни озмун ба иштирокчиён ҷойҳои корӣ дар ширкатҳои хизматрасонӣ, меҳмонхона ва тарабхонаҳои Давлати Қатар пешниҳод гардид. Довталабон имконият пайдо намуданд, ки маълумот дар бораи таҷрибаи корӣ, малакаҳои касбӣ ва сатҳи омодагии худ ба фаъолияти меҳнатӣ дар хориҷи кишварро пешниҳод намоянд.
Қобили зикр аст, ки баргузории чунин озмунҳо ба танзими муҳоҷирати меҳнатӣ, пешгирии муҳоҷирати ғайриқонунӣ ва таъмин намудани ҳуқуқу манфиатҳои шаҳрвандони кишвар мусоидат менамояд.
Ҳамзамон, озмуни навбатии ҷойҳои холии корӣ дар ширкатҳои Давлати Қатар дар моҳи январи соли 2026 ба нақша гирифта шудааст. Шаҳрвандоне, ки донандаи забони англисӣ ва ё арабї мебошанд, метавонанд ба Муассисаи давлатии «Марказҳои машваратӣ ва омодагии пеш аз сафари муҳоҷирони меҳнатӣ» муроҷиат намоянд.
Барои гирифтани маълумоти иловагӣ бо рақамҳои зерин дар тамос шавед: тел: 2250575, 2250221
Суроға: шаҳри Душанбе, кӯчаи Айнӣ 121, Хадамоти муҳоҷират
Маркази матбуоти Хадамоти муҳоҷират
