Бо ибтикори бахши Хадамоти муҳоҷират дар шаҳри Левакант якҷо бо сохторҳои Мақомоти иҷроияи ҳокимияти давлатии шаҳр дар деҳаи Нурафшони Ҷамоати деҳоти Ваҳдат вохӯрии судманд бо мақсади шарҳу тавзеҳи Паёми Президенти Ҷумҳурии Тоҷикистон бо сокинон баргузор гардид.
Зимни суханронӣ маърӯзачиён оид ба муҳтавои Паёми Президенти Ҷумҳурии Тоҷикистон ба Маҷлиси Олии Ҷумҳурии Тоҷикистон “Дар бораи самтҳои асосии сиёсати дохилию хориҷии Ҷумҳурии Тоҷикистон” бо сокинон ибрози андеша намуда, қайд карданд, ироаи паёми имсола барои Тоҷикистон бо рӯйдодҳои муҳими сиёсӣ, аз ҷумла баргузории интихобот дар фазои озоду шаффоф ва ҳалли пурраи масъалаҳои сарҳадӣ бо Ҷумҳурии Қирғизистон фарқ мекунад. Ин дастовардҳо далели сиёсати сулҳомез, ҳамсоягии нек ва устувории давлатдории миллӣ мебошанд.
Ҳамзамон, қайд гардид, ки Паём бозгӯи болоравии мавқеи байналмилалии Тоҷикистон аст. Ташаббусҳои кишвар дар доираи Созмони Милали Муттаҳид вобаста ба ҳифзи пиряхҳо, тағйирёбии иқлим, криосфера, зеҳни сунъӣ ва маърифати ҳуқуқӣ аз ҷониби ҷомеаи ҷаҳонӣ дастгирӣ ёфтанд. Ин иқдомҳо Тоҷикистонро ҳамчун давлати ташаббускор, масъул ва дорои дидгоҳи глобалӣ муаррифӣ намуда, нуфузи онро дар арсаи байналмилалӣ тақвият мебахшанд. Дар маркази Паём масъалаи рушди иҷтимоию иқтисодӣ қарор дорад. Таъкид гардид, ки дар даҳ соли охир иқтисоди миллӣ бо суръати устувор рушд карда, сатҳи камбизоатӣ коҳиш ёфта, даромади аҳолӣ ва нишондиҳандаҳои иҷтимоӣ беҳтар шудаанд.
Дар идома маърӯзачиён вобаста ба густариши корњои ободонї, риояи қонунҳои Ҷумҳурии Тоҷикистон “Дар бораи танзими ҷашну маросим дар Ҷумҳурии Тоҷикистон”, “Дар бораи масъулияти падару модар дар таълиму тарбияи кӯдак”, “Дар бораи тарбияи ватандӯстии шаҳрвандон”, таблиғу ташвиқи фарҳанги миллӣ, сарфаю сариштакорӣ, одоби шањрнишинї, пешгирии пошхӯрии оилаҳои ҷавон ва даъвати љавонон ба хизмати Ватан ибрози андеша намуданд.
Дар ҷараёни вохӯрӣ намояндаи бахши Хадамоти муҳоҷират дар шаҳри Левакант ба таваҷҷуҳи сокинон расонид, ки аз 1 сентябри соли 2025 дар шаҳри Москва ва вилояти он озмоиш оид ба татбиқи механизмҳои нави бақайдгирии муҳоҷирони меҳнатӣ, ки ба Россия бе раводид ворид мешаванд, роҳандозӣ гардидааст.
Дар доираи ин озмоиш, шаҳрвандони хориҷӣ вазифадоранд мустақилона ба Вазорати корҳои дохилии Россия дар бораи ҷойи воқеии иқомати худ тавассути барномаи мобилии “Амина” иттилоъ диҳанд.
Таъкид гардид, ки иштирок дар озмоиш танҳо барои он шаҳрвандон пешбинӣ шудааст, ки дар шаҳри Москва ва вилояти он иқомат ва фаъолият доранд, пешбинӣ шудааст. Дар дигар минтақаҳои Федератсияи Россия тартиби амалкунандаи бақайдгирии муҳоҷирони хориҷӣ боқӣ мондааст ва тибқи қонунгузории амалкунанда анҷом дода мешавад.
Ёдрас мекунем, ки осонтарин роҳ барои ба қайд гирифтани шаҳрванд — ин онлайн-бақайдгирӣ тавассути портали “Госуслуги” мебошад.
Маркази матбуоти Хадамоти муҳоҷират
