Шуъбаи Хадамоти муҳоҷират дар ноҳияи Бобоҷон Ғафуров бурдани корҳои фаҳмондадиҳиро яке аз самтҳои афзалиятноки фаъолияти худ қарор дода, дар ҷамоату  шаҳраки ноҳия мулоқоти судманд бо  фаъолон, раисони маҳаллаҳо, имомхатибон ва аъзои оилаи муҳоҷирони меҳнатӣ доир намуд.

Дар чорабиниҳои мазкур сардори  шуъбаи Хадамоти муҳоҷират дар ноҳия вобаста ба масъалаҳои бо ҷойи кор таъмин намудани муҳоҷирони манъгашта дар ҶСК “НБО Роғун”, муҳоҷирати бехатар ва муқовимат ба савдои одамон, мубориза бар зидди коррупсия, оид ба вазъи муҳоҷирони ноҳия, ки дар Федератсияи Россия фаъолияти меҳнатӣ доранд, инчунин дар бораи пешгирии шомилшавии ҷавонон ба ҳизбу ҳаракатҳои номатлуб ва дигар масъалаҳои мубрами рӯз,  суханронӣ намуданд.

Ҳамзамон,  ба шаҳрвандоне, ки  хоҳиши сафар  барои фаъолияти меҳнатӣ ба кишварҳои хориҷа, аз ҷумла Федератсияи Россия доранд, дар бораи тартиби дароз намудан ва ё кам намудани муҳлати будубоши шаҳрвандони хориҷӣ ва шахсони бешаҳрванд дар Федератсияи Россия, ба расмият даровардани ҳуҷҷатҳо, гирифтани патент, қайди муваққатӣ, бастани шартнома бо кордиҳанда ва дигар масъалаҳои мубрами рӯз  ироа намуданд.

Маркази матбуоти Хадамоти муҳоҷират