Бо ибтикори МД “Марказҳои машваратӣ ва омодагии пеш аз сафари муҳоҷирони меҳнатӣ” дар шаҳри Хоруғ якҷо бо сохторҳои Мақомоти иҷроияи ҳокимияти давлатии шаҳри Хоруғ вохӯри судманд дар маҳаллаи Сайфулло Абдулои шаҳр бо ҷавонон ва муҳоҷирони ба ватан бозгашта баргузор гардид.

Ҳадафи асосии гузаронидани чорабинӣ ин огоҳ намудани шаҳрвандон, аз ҷумла ҷавонон, пешгирии муҳоҷирати ғайриқонунӣ, саривақт тарк намудани кишвари будубош баъд аз анҷоми муҳлати раводид ва хатарҳои эҳтимолии вобаста ба муҳоҷират мебошад.

Дар рафти суҳбат бо сокинони шаҳр доир ба тағйироту иловаҳо ба қонунгузории нави Федератсияи Россия дар самти муҳоҷирати меҳнатӣ, будубоши шаҳрвандони Ҷумҳурии Тоҷикистон дар давлати номбурда, омодагӣ пеш аз сафар, бақайдгирӣ, ҳуҷҷатгузорӣ дар Федератсияи Россия, пешниҳоди сертификат оид ба донистани забони русӣ, таъриху тамаддун ва асосҳои қонунгузории ин кишвар (тарзи супоридани имтиҳонҳо), доштани касби мувофиқ ва ҳуҷҷати тасдиқкунандаи он, корти муҳоҷирӣ, дар қайди муҳоҷирӣ истодан, гирифтани патент, тартиби дар қайди ҷойи истиқомат гузоштани шаҳрвандони хориҷа, тарзи бастани шартномаи меҳнатӣ, ҳуқуқ ва уҳдадориҳои корфармо ва коргар фаҳмонида шуд.

Аз ҷумла, қайд карданд, ки дар ҳолати зарур набудан ба қаламрави Федератсияи Россия сафар накунанд, инчунин доир ба истифодаи дурусти шабакаҳои иҷтимоӣ якчанд дастур доданд, ки тариқи телефонҳои мобилӣ низ ба гурӯҳҳое, ки оиди дуруст ё нодуруст буданаш маълумот надоранд шинос нашаванд ва фирефтаи нафарони бадхоҳ ва душманони миллат нагарданд.

Дар баробари масъалаҳои дар рузнома дарҷ ёфта, масъалаи асосӣ роҳӣ пешгири намудани бекорӣ ва таъмини муҳоҷирони ба ватан бозгашта барои кор кардан дар ширкатҳои сохтмонии дохили вилоят номнавис шуданд.

Дар хатми вохӯрӣ ба ҳар як шаҳрванд дастурамали мухтасар оиди муҳоҷирати меҳнатӣ брошюраҳо, варақаҳои иттилоотӣ-маърифатӣ тақсим карда шуданд.

Маркази матбуоти Хадамоти муҳоҷират