Бо мақсади фароҳам овардани шароити мусоид ба шаҳрвандони бекор ва муҳоҷирони ба Ватан бозгашта ҷиҳати интихоби кори мувофиқ ва ба кордиҳандагон барои интихоби мутахассисони ба талаботашон мувофиқ аз ҷониби бахши Хадамоти муҳоҷират дар ноҳияи Рӯдакӣ якҷо бо раёсати Агентии меҳнат ва шуғли аҳолӣ дар ноҳия ярмаркаи ҷойҳои кории холӣ ва вазифаҳои озодро баргузор намуданд.
Дар ярмарка корхонаю ташкилот, муассисаҳо, ширкатҳо ва марказҳои касбомӯзӣ ноҳия иштирок карда, ба корҷӯён ҷойҳои кории холӣ ва хизматрасониҳои касбомӯзиро пешниҳод намуданд.
Дар ярмаркаи мазкур роҳбарияти бахши Хадамоти муҳоҷират ширкат варзида, бо намояндагони корхонаю ташкилотҳо ва корҷӯён мулоқот намуданд. Аз ҷумла, дар рафти вохӯрӣ оид ба қонунҳои нави Федератсияи Россия дар самти муҳоҷирати меҳнатӣ, муҳоҷирати бехатар, барасмиятдарории саривақтии ҳуҷҷатҳои дахлдори танзимкунандаи будубоши қонунӣ, дури ҷустан аз ҳар гуна гурӯҳҳои террористиву экстремисти, ифротгарову хуруфотпараст ва оиди бемориҳои вируси норасоии масъунияти бадан (ВИЧ/СПИД) корҳои фаҳмондадиҳӣ гузаронида шуд.
Бо назардошти афзоиши аҳолӣ ва эҳтиёҷ ба ҷойҳои нави корӣ, ташкил ва баргузор намудани ярмаркаҳои ҷойҳои кории холӣ яке аз роҳҳои муассири коҳиш додани сатҳи бекорӣ ва беҳтар намудани шароити зиндагии мардум маҳсуб меёбад. Ярмаркаҳои ҷойҳои корӣ як василаи муҳими пайваст кардани кордиҳандагон бо шахсони ҷӯяндаи кор ба ҳисоб меравад.
Маврид ба зикр аст, ки ҷиҳати иҷрои Нақшаи чорабиниҳои “Барномаи давлатии мусоидат ба шуғли аҳолӣ дар Ҷумҳурии Тоҷикистон барои солҳои 2023-2027” аз ҷониби мақомоти меҳнат ва шуғли аҳолӣ барои бо кор таъмин намудан, ба касбомӯзӣ ҷалб кардан ва машварати касбӣ расонидан мунтазам ярмаркаҳои ҷойҳои кории холӣ ва вазифаҳои озод дар тамоми шаҳру ноҳияҳои ҷумҳурӣ доир мегардад.
Маркази матбуоти Хадамоти муҳоҷират
