Пешгирӣ аз коррупсия яке аз масъалаҳои муҳиму сарнавиштсози ҷомеаи муосир ба ҳисоб меравад. Коррупсия ҳамчун падидаи номатлуб ба пояҳои давлатдорӣ латма зада, ба рушди иқтисодӣ, иҷтимоӣ ва фарҳангии кишвар монеаи ҷиддӣ эҷод мекунад. Бесабаб нест, ки Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон таъкид менамоянд: “Коррупсия ба амнияти давлат, рушди иқтисод ва эътимоди мардум ба ҳокимият зарари ҷиддӣ мерасонад”.

Имрӯз ин падида на танҳо мушкили як давлат, балки дарди ҷомеаи ҷаҳонӣ мебошад. Сиёсатмадори маъруфи ҷаҳон Нелсон Мандела дар ин маврид чунин гуфтааст: “Коррупсия мисли заҳр аст, ки эътимоди мардумро ба давлат нобуд месозад”. Воқеан ҳам, дар ҷомеае, ки коррупсия реша медавонад, адолат поймол гардида, сатҳи зиндагии мардум поин меравад.

Дар Ҷумҳурии Тоҷикистон мубориза бар зидди коррупсия яке аз самтҳои афзалиятноки сиёсати давлатӣ эълон шудааст. Қабули қонунҳои дахлдор, таъсиси ниҳодҳои махсус ва ҳамкорӣ бо созмонҳои байналмилалӣ далели равшани иродаи сиёсӣ дар ин самт мебошад. Бо вуҷуди ин, Пешвои миллат борҳо таъкид намудаанд, ки бе иштироки фаъолонаи ҷомеа решакан намудани коррупсия ғайриимкон аст.

Сиёсатмадори дигар, Кофи Аннан — Дабири кулли собиқи СММ, гуфта буд: “Коррупсия яке аз монеаҳои асосӣ дар роҳи рушди устувор, демократия ва волоияти қонун аст”. Аз ин лиҳоз, ҳар як шаҳрванди солим бояд дарк намояд, ки бетарафӣ нисбат ба коррупсия худ як навъ мусоидат ба паҳншавии он мебошад. Нақши шаҳрвандон пеш аз ҳама дар риояи қонун, поквиҷдонӣ, эҳтиром ба арзишҳои миллӣ ва тарбияи насли наврас дар рӯҳияи адолат ва ростқавлӣ зоҳир мегардад.

Арасту, файласуфи бузурги Юнони Қадим, гуфтааст: “Давлат танҳо дар он сурат устувор мемонад, ки қонун аз ҳама боло бошад”. Ин суханҳо имрӯз низ аҳамияти бузург доранд.

Пешгирӣ намудани амалҳои коррупсионӣ ва мубориза бо он вазифа ва масъулияти шаҳрвандии ҳар як фарди худогоҳу ватандӯст аст. Танҳо бо муттаҳидӣ, зиракии сиёсӣ, маърифати ҳуқуқӣ ва мавқеи оштинопазир нисбат ба фасод метавон ҷомеаи солим ва давлати пешрафтаро бунёд намуд. Пешгирӣ аз коррупсия — ин мубориза барои адолат, шараф ва ояндаи дурахшони миллат мебошад.

Ҳусейнҷон Зоидов,

Мудири бахши муҳоҷирати дохилӣ ва экологии раёсати Хадамоти муҳоҷират дар вилояти Суғд