Дар асоси қарори Раиси шаҳри Душанбе аз 10 декабри соли 2025, №805 “Дар бораи таҳким бахшидани корҳои таблиғотию фаҳмондадиҳӣ дар ростои истиқболи шоиста аз 35–солагии Истиқлоли давлатии Ҷумҳурии Тоҷикистон дар ҳудуди шаҳри Душанбе барои нимсолаи якуми соли 2026” санаи 11 марти соли 2026 гурӯҳи кории муштараки сохторҳои дахлдор дар ноҳияи Фирдавсӣ бо фаъолон ва сокинони ноҳия дар МТМУ №129 вохӯрии судманд анҷом доданд.
Дар вохӯрии мазкур маърузачиён оид ба шарҳу тавзеҳи Паёми Президенти Ҷумҳурии Тоҷикистон, муҳтарам Эмомалӣ Раҳмон ба Маҷлиси Олии Ҷумҳурии Тоҷикистон, вобаста ба риояи талаботи Қонунҳои Ҷумҳурии Тоҷикистон “Дар бораи танзими ҷашну маросим дар Ҷумҳурии Тоҷикистон”, “Дар бораи масъулияти падару модар дар таълиму тарбияи кӯдак”, “Дар бораи низоми огоҳонӣ ва пешгирии ҳуқуқвайронкунии ноболиғон”, “Дар бораи тарбияи ватандустии шаҳрвандон”, таблиғу ташвиқи фарҳанги миллӣ, сарфаю сариштакорӣ, одоби шаҳрнишинӣ, пешгирии пошхурии оилаҳои ҷавон, даъвати ҷавонон ба сафи Қувваҳои Мусаллаҳи Ҷумҳурии Тоҷикистон, пешгирии гаравидани шаҳрвандон бахусус ҷавонон ба ҳизбу ҳаракатҳои тундрави экстремистиву террористӣ, муҳоҷирати бехатар ва густариши корҳои ободонӣ суханронӣ намуданд.
Дар ҷараёни вохӯрӣ намояндаи Раёсати Хадамоти муҳоҷират дар шаҳри Душанбе ба тавҷҷуҳи сокинон расонид, ки аз 1 марти соли 2026 тибқи Қонуни Федералии № 419-ФЗ аз 17.11.2025 рӯйхати асосҳо барои қатъ намудани шартномаи меҳнатӣ бо шаҳрванди хориҷӣ васеъ карда шуд.
Аз санаи зикршуда корфармоён ҳуқуқ пайдо карданд, ки шартномаи меҳнатиро бо кормандони хориҷӣ дар ҳолате бекор намоянд, ки агар субъекти Федератсияи Россия нисбат ба намуди муайяни фаъолияти меҳнатии онҳо маҳдудият ҷорӣ намояд.
Қаблан Кодекси меҳнатии Федератсияи Россия танҳо дар ҳолати ҷорӣ гардидани маҳдудиятҳо дар сатҳи федералӣ имконияти қатъ намудани шартномаи меҳнатиро бо шаҳрванди хориҷӣ пешбинӣ мекард. Тағйиротҳои воридшуда ин рӯйхатро бо асосҳое, ки ба қарорҳои мақомоти давлатии субъектҳои Федератсияи Россия вобастаанд, пурра менамоянд.
Хотиррасон менамоем, ки аз соли 2015 субъектҳои Федератсияи Россия ҳуқуқ доранд ҳамасола нисбат ба ҷалби кормандони хориҷие, ки ба Федератсияи Россия дар низоми бидуни раводид ворид шуда, дар асоси патент фаъолият мекунанд, барои намудҳои алоҳидаи фаъолияти иқтисодӣ маҳдудият муқаррар намоянд.
Вохӯрӣ дар вазъияти самимӣ бо саволу ҷавобҳои зиёд гузашт
Маркази матбуоти Хадамоти муҳоҷират
