Санаи 17-уми марти соли 2026 дар Хадамоти муҳоҷират машғулияти идоравӣ доир ба шарҳу тавзеҳи Қонуни Ҷумҳурии Тоҷикистон “Дар бораи танзими ҷашну маросим дар Ҷумҳурии Тоҷикистон” баргузор гардид. Дар он кормандони дастгоҳи марказӣ ва МД “Марказҳои машваратӣ ва омодагии пеш аз сафари муҳоҷирони меҳнатӣ” иштирок намуданд.
Машғулияти идоравиро муовини якуми Сардори Хадамоти муҳоҷират Шарифзода Маҳмадсалим Пир оғоз карда қайд намуд, ки қабули қонун дар самти танзими ҷашну маросим барои баланд бардоштани сатҳи зиндагии аҳолӣ, пешгирӣ аз зиёдаравӣ ва хароҷоти беҳуда нигаронида шудааст.
Сипас сухан ба сармутахассиси Раёсати танзими ҷашну маросими Кумитаи дин, танзими ҷашну маросими назди Ҳукумати Ҷумҳурии Тоҷикистон Чилахон Раҷабалӣ дода шуд. Ӯ зимни суханронии худ ба ҳозирин оид ба дастовардҳои Қонуни Ҷумҳурии Тоҷикистон “Дар бораи танзими ҷашну маросим дар Ҷумҳурии Тоҷикистон” ва оқибатҳои риоя накардани қонуни мазкур маълумот дода, мафҳумҳои асосии қонунро дар таҳрири нав шарҳу тавзеҳ доданд.
Қонуни мазкур бо дастури бевоситаи Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон соли 2024 дар таҳрири нав қабул гардид, ки аз 6 боб ва 22 модда иборат мебошад. Ҳадаф аз қабули қонуни мазкур мусоидат ҷиҳати ба зиндагии шоиста расидани шаҳрвандони кишвар мебошад. Зимни пешниҳоди маърӯза моҳияти баргузор намудани маъракаву маросимҳо фаҳмонида шуда, доир ба анҷом додани корҳои хайру савоб, ба монанди дастгирии ниёзмандон, сохта ба истифода додани иншооти аз ҷиҳати иҷтимоӣ муҳим – муассисаҳои томактабӣ, бунгоҳҳои тиббӣ, таъмири пулу роҳҳо, инчунин мо, ки дар арафаи Иди моҳи шарифи Рамазон қарор дорем сарфакорӣ ва камхарҷиро фаромӯш накунем ва ғайра тавсияҳо дода шуданд.
Тартиби баргузории ҷашнҳои расмӣ, зодрӯз, хатнасур ва маросими дигари вобаста ба таваллуди кӯдак, тӯйи домодию арӯсӣ, маросими ҳаҷ ва умра, маросими дафну азодорӣ, вақт ва давомнокии баргузории ҷашну маросим ва инчунин тартиби тариқи электронӣ ба қайд гирифтани маъракаву маросимҳо тавассути сомонаи Кумитаи дин, танзими ҷашну маросими назди Ҳукумати Ҷумҳурии Тоҷикистон www.tanzim.tj ба ҳозирин фаҳмонида шуд. Дар чорабинӣ муҳтавои ҳар як боб, модда ва ҷазоҳои пешбинишуда барои вайрон намудани муқаррароти қонуни мазкур ба иштирокчиён шарҳ дода шуд.
Дар фарҷоми чорабинӣ Чилахон Раҷабалӣ ба саволҳои иштирокчиёни ҳамоиш посух доданд.
Маркази матбуоти Хадамоти муҳоҷират
