Кормандони масъули шуъбаи Хадамоти муҳоҷират дар шаҳри Кӯлоб оиди тақвият додани корҳои фаҳмондадиҳӣ дар байни муҳоҷирони меҳнатӣ дар “Фурудгоҳи байналмилалии Кӯлоб” вобаста ба муҳоҷиратӣ бехатар, тавсия додан ба шаҳрвандоне, ки ба ватан бозгаштаанд бо ҷойи кор дар ширкатҳои ватанӣ, пешгирии пайвастани муҳоҷирон ба сафи гурӯҳҳои ифротгароии динӣ, савдои одамон ва қонунҳои нави Федератсияи Россия дар самти муҳоҷират, ҷоннок намуда истодаанд.

Дар ҷараёни вохӯрӣ мутахассиси пешбари шуъба Абдулфайз Сафаров, таваҷҷуҳи махсус ба масъалаҳои огоҳии ҳуқуқӣ ва иҷтимоии шаҳрвандон доданд. Муҳоҷирон оид ба зарурати риояи ҳатмии қонунгузории Федератсияи Россия, қоидаҳои техникаи бехатарӣ дар ҷойҳои корӣ ва инчунин меъёрҳои беҳдоштӣ, ки мустақиман ба ҳифзи саломатӣ таъсир мерасонанд, хотиррасон карда шуданд.

Инчунин, масъалаҳои амнияти иттилоотӣ баррасӣ гардида, ба иштирокчиён хавфҳои эҳтимолии истифодаи манбаъҳои шубҳаноки интернетӣ шарҳ дода шуд ва онҳоро аз хатари ҷалб шудан ба гурӯҳҳои харобкор ва ташкилотҳои номатлуб ҳушдор доданд.

Дар рафти суҳбат муҳоҷирон як қатор саволҳои амалӣ, аз ҷумла дар бораи хусусиятҳои истифодаи замимаи ruID ва инчунин кори замимаи нави “Амина” ҷавобҳои мушаххас дода шуда, иштирокчиён маслиҳатҳои зарурӣ оид ба масъалаҳои ҳуқуқӣ ва иҷтимоии марбут ба иқомат ва фаъолияти меҳнатии худ дар Федератсияи Россия гирифтанд.

Дар вохӯрӣ инчунин таъкид гардид, ки дар сурати иҷро нашудани шартҳои шартномаи меҳнатӣ аз ҷониби корфармоён, шаҳрвандон метавонанд ҳамеша ба Намояндагии Вазорати меҳнат, муҳоҷират ва шуғли аҳолии Ҷумҳурии Тоҷикистон дар кишвари Россия оид ба муҳоҷират муроҷиат намуда, кӯмаки ҳуқуқӣ ва мусоидат барои гирифтани музди меҳнат аз ҳисоби корфармоён ва дигар кумакҳои ҳуқуқӣ дарёфт намоянд.

Ҳамзамон, бо муҳоҷирони меҳнатие, ки аз қаламрави Федератсияи Россия ба ватан базгаштаанд, суҳбатҳо карда шуда ба онҳо тавсия дода шуд, ки ба Агентии меҳнат ва шуғли аҳолии минтақаи зисти худ муроҷиат намуда, дар ширкатҳои ватанӣ, аз он ҷумла НБО “Роғун” ба онҳо ҷойҳои кории холӣ пешниҳод менамоянд.                                                                                                                                                                                                                                                                                                                                                                                                                                  

Маркази матбуоти Хадамоти муҳоҷират