Бо ибтикори шуъбаи Хадамоти муҳоҷират дар шаҳри Панҷакент мизи мудаввар бо  иштироки кормандони Агентии мехнат ва шуғли аҳолии шаҳр, кормандони ҷамоатҳо  ва иттифоқи касаба  доир гардид.

Дар ҷараёни вохӯрӣ баромадкунандагон масъалаҳои вобаста ба шартномаҳои меҳнатӣ, ҳифзи ҳуқуқ ва манфиатҳои муҳоҷирони меҳнатӣ, гирифтани иҷозатномаи кор, сабти ном дар кишвари қабулкунанда ва риояи қоидаҳои будубош баррасӣ шуданд. Масъулин зикр намуданд, ки риояи талаботи қонун кафолати амният ва фаъолияти қонунии шаҳрвандон дар хориҷи кишвар мебошад.

Ҳамзамон, ба иштирокчиён фаҳмонда дода шуд, ки аз муроҷиат ба миёнаравҳои ғайриқонунӣ ва шахсони тасодуфӣ худдорӣ намоянд, зеро чунин амалҳо метавонанд ба мушкилоти ҳуқуқӣ ва молиявӣ оварда расонанд. Ба шаҳрвандон тавсия дода шуд, ки танҳо ба маълумоти расмӣ ва манбаъҳои боэътимод такя намоянд.

Дар қисмати саволу ҷавоб иштирокчиёни ҷамоатҳо оиди шартномаи меҳнатӣ ва оиди  масъалаҳои муҳоҷирати мавсимӣ, тартиби баргашт ба Ватан, инчунин масъулияти ҳуқуқӣ барои вайрон кардани қоидаҳои будубош саволҳо пешниҳод намуда, посухҳои мушаххас гирифтанд.

Дар анҷоми чорабинӣ таъкид гардид, ки гузаронидани чунин вохӯриҳои фаҳмондадиҳӣ барои баланд бардоштани маърифати ҳуқуқии аҳолӣ, пешгирии қонуншиканиҳо ва ҳифзи манфиатҳои шаҳрвандон аҳамияти муҳим дорад.

Маркази матбуоти Хадамоти муҳоҷират