Бо ташаббуси бахши Хадамоти муҳоҷират дар шаҳри Конибодом дар Ҷамоати деҳоти Пулотон, деҳаи Роҳи нав дар якҷоягӣ бо намояндагони КИ ҲХДТ дар шаҳр ва мақомоти иҷроияи ҳокимияти давлатии шаҳр ва дигар сохторҳои дахлдор суҳбату вохӯриҳо баргузор гардид.
Дар рафти вохӯрӣ масъалаҳои шарҳу тавзеҳи Паёми Асосогузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ҷалби ҷавонон ба сафи Қувваҳои Мусаллаҳи Ҷумҳурии Тоҷикистон, тарбияи ҳисси ватандӯстӣ, инчунин омодагӣ ва иштироки фаъолонаи мардум ба истиқболи 35 – солагии Истиқлоли давлатии Ҷумҳурии Тоҷикистон мавриди баррасӣ қарор дода шуданд.
Зимни чорабинӣ бо сокинон аҳамияти хизмати ҳарбӣ ҳамчун мактаби мардонагиву шуҷоат ва қарзи шаҳрванди фаҳмонида шуда, даъват ба ҳамгироӣ ва саҳмгузорӣ дар корҳои ободониву созандагӣ баён гардид.
Инчунин, дар ин ҷараёни вохурӣ мудири бахши Хадамоти муҳоҷират дар шаҳр Фарзона Толибова бори дигар оид ба тағйироту иловаҳо дар қонунгузории Федератсияи Россия дар самти муҳоҷират сухан ронда қайд карданд, ки аз 1 марти соли 2026 тибқи Қонуни Федералиии №419- ФЗ аз 17.11.2025 руйхати асосҳо барои қатъ намудани шартномаи меҳнатӣ бо шаҳрванди хориҷӣ васеъ карда шудааст.
Қаблан Кодекси меҳнатии Федератсияи Россия нисбат ба намуди муайян фаъолияти меҳнатии онҳо маҳдудиятҳо дар сатҳи федералӣ имконияти қатъ намудани шартномаи меҳнатиро ба шаҳрванди хориҷӣ пешбинӣ мекард. Тағйиротҳои воридшуда ин руйхатро бо асосҳое, ки ба қарорҳои мақомоти давлатии субъектҳои Федератсияи Россия вобастаанд, пурра намоянд.
Маркази матбуоти Хадамоти муҳоҷират
