Дар асри XXI, ки онро асри иттилоот ва ҷаҳонишавӣ меноманд, масъалаи ҳифзи арзишҳои миллӣ ва таҳкими худшиносии миллӣ ба яке аз самтҳои муҳимми сиёсати иҷтимоӣ ва фарҳангии ҳар як давлат табдил ёфтааст. Барои Ҷумҳурии Тоҷикистон, ки дорои таърихи куҳан, фарҳанги ғанӣ ва анъанаҳои пурқиммат мебошад, ин масъала аҳамияти хос дорад. Дар ин раванд, нақши ҷавонон, ҳамчун нерӯи фаъол ва ояндасози ҷомеа ниҳоят бузург аст.

Худшиносии миллӣ ҳамчун як мафҳуми иҷтимоӣ ва фарҳангӣ, дарки мансубияти шахсро ба миллат, эҳтиром ба таърих, забон, фарҳанг ва арзишҳои миллӣ дар бар мегирад. Ифтихори миллӣ бошад, натиҷаи ҳамин худшиносӣ буда, дар шакли эҳсоси ифтихор аз дастовардҳои миллат, ҳифзи мероси фарҳангӣ ва талош барои рушди он зоҳир мегардад.  

Ҷавонон барандаи асосии неруи зеҳнӣ ва ҷисмонии ҷомеа буда, қобилияти бузурги меҳнатӣ, эҷодиёти техникӣ ва фарҳангию бадеӣ, фаъолияти истеҳсолӣ дар тамоми соҳаҳои мавҷудияти инсонро дорад.

Ҷавонон дурнамои бузурги иҷтимоӣ ва касбӣ доранд, онҳо нисбат ба дигар гурӯҳҳои иҷтимоии ҷамъият тезтар дониш, касбу ҳунар ва ихтисосҳои нав азхуд карда метавонанд.

Масъалаи асосӣ ҳангоми баррасии нақши ҷавонон дар ҷомеа, масъалаи субъект ва объекти дигаргуниҳои иҷтимоӣ мебошад.  Ҷавон ба ҳаёт ворид шуда, зери таъсири шароити иҷтимоӣ, оила, муассисаҳои таълимӣ қарор гирифта, баъдтар дар раванди ба воя расидан ва ба марҳилаҳои баркамолтари рушд гузаштан ба ҷомеа таъсири ҷиддӣ мерасонад.

Бо вуҷуди ин, дар шароити ҷаҳонишавӣ ва таъсири фарҳангҳои хориҷӣ, хатари коста гардидани арзишҳои миллӣ вуҷуд дорад. Баъзе ҷавонон зери таъсири фарҳангҳои бегона қарор гирифта, аз арзишҳои миллии худ дур мешаванд. Ин ҳолат зарурати андешидани чораҳои муассирро барои ҳифзи ҳувияти миллӣ тақозо менамояд.

Ҳамчунин бояд таъкид кард, ки ифтихори миллӣ набояд ба ифротгароӣ ё беэҳтиромӣ нисбат ба дигар миллатҳо оварда расонад. Баръакс, шахси дорои худшиносии баланд метавонад бо эҳтиром ба дигар фарҳангҳо муносибат намояд ва дар айни замон арзишҳои миллии худро ҳифз кунад. Ин гуна муносибат ба ташаккули ҷомеаи таҳаммулгаро ва пешрафта мусоидат мекунад.

Дар фарҷом метавон гуфт, ки ҷавонон ҳамчун қишри фаъоли ҷомеа дар таҳкими худшиносӣ ва ифтихори миллӣ нақши калидӣ доранд. Онҳо метавонанд бо дониш, маърифат, фаъолияти иҷтимоӣ ва эҳсоси масъулиятшиносӣ дар рушди ҷомеа саҳми арзанда гузоранд. Танҳо бо тарбияи ҷавонони худшинос, ватандӯст ва соҳибмаърифат метавон ояндаи дурахшони миллатро таъмин намуд.

Норматов Диёр,

Директори МД “Марказҳои машавратӣ ва омодагии пеш аз сафари муҳоҷирони меҳнатӣ” дар шаҳри Душанбе