Санаи 8 майи соли 2026, дар Хадамоти муҳоҷират бо иштироки роҳбарият якҷо бо намояндагони шуъбаи вазорати корҳои дохилӣ дар  ноҳияи Шоҳмансур, вохӯрии судманд бо шаҳрвандон баргузор гардид, ки дар он оиди қонунҳои нави Федератсияи Россия дар самти муҳоҷират, аз ҷумла пӯшидани сару либоси ба кишвари қабулкунанда мутобиқ, доштани риши дароз, бе чуну чаро риояи қонунҳои кишвари иқомат ва дигар масъалаҳои вобаста ба муҳоҷират, баррасӣ гардид.

Дар ҷараёни мулоқот ҳозирин дар бораи таҳдидҳо вобаста ба савдои одамон суханронӣ намуда, иброз доштанд, ки ин зуҳурот на танҳо дар Тоҷикистон балки дар тамоми ҷаҳон вуҷуд дорад ва бояд ҳар яки мо аз он гоҳ шавем, чунки ҷинояткорон бо роҳҳои ҳиллаю найрангбозӣ, таҳдид, зӯроварӣ одамонро ба доми фиреб гирифтор карда, онҳоро ба сифати ғулом истифода мебаранд. Аз ин амалҳои ғайриқонунӣ ва ғайриинсонӣ ҷинояткорон даромадҳои калони маблағҳои пулӣ ба даст меоваранд. Мутахассисон ҳисоб карда баромаданд, ки аз ҷиҳати ба даст даровардани маблағҳои пулӣ савдои одамон айни замон дар ҷаҳон ҷойи якумро ишғол кардааст. Яъне, савдои одамон аз дигар ҷиноятҳо пеш гузаштааст, ҳатто аз муомилоти ғайриқонунии маводи нашъадор.

Инчунин, дар вохӯрӣ оид ба риояи қонунгузории кишвари иқомат, тартиби ба роҳ мондани фаъолияти ҳар як муҳоҷир тибқи талаботҳои муқаррарнамудаи қонунгузорӣ, барасмиятдарории саривақтии ҳуҷҷатҳои дахлдори танзимкунандаи будубоши қонунӣ, дури ҷустан аз ҳар гуна гурӯҳҳои террористиву экстремистӣ, ифротгарову хуруфотпараст, суханронӣ намуданд.

Илова бар ин, таваҷҷуҳи ҳозирин ба масъалаҳои тандурустӣ ҷалб карда шуд. Аз ҷумла, маълумот дар бораи бемориҳои вирусӣ, махсусан ВИЧ/СПИД ва сил пешниҳод гардид. Таъкид шуд, ки риояи меъёрҳои беҳдоштӣ ва нигоҳубини саломатӣ омили муҳими пешгирии ин бемориҳо мебошад.

Дар анҷом, ҳамаи иштирокчиён имконият пайдо карданд, ки саволҳои худро пешниҳод намуда, ҷавобҳои зарурӣ дарёфт намоянд.

Маркази матбуоти Хадамоти муҳоҷират